ORANJESTAD (AAN): Representantenan di sector UTV/ATV a expresa nan satisfaccion despues di e dialogo cu a conduci na un entendemento entre Gobierno y sector,
destacando cu e resultado ta demostra importancia di sinta na mesa, scucha otro y busca solucion den un ambiente constructivo. Esaki despues cu Gobierno di Aruba y seis tour operators a firma un protocol di colaboracion pa fortalece e dialogo riba e maneho di actividadnan turistico den nos area natural.
E acuerdo a sigui e decision reciente di hues, cu habri caminda pa continua e consulta entre Gobierno, e operadornan di tour riba UTV’s y ATV’s y otro stakeholder.
Durante nan reaccion, e representantenan a enfatisa cu proteccion di naturalesa ta un responsabilidad comparti. Marvin Kelly (ABC Tours Aruba), sector tambe ta consciente di su responsabilidad pa conserva y proteha e areanan natural di Aruba, mientras cu ta importante pa busca un balans cu ta permiti e actividadnan di sector continua di forma responsabel.
Sharlise Croes (Fofoti Tours): “Nos ta hopi contento cu nos a yega na e punto aki. Nos tabata cu e pensamento cu si nos por dialoga, nos por yega na solucion,” el a expresa. Sector a indica tambe cu e proceso a exigi hopi trabao y dialogo, pero cu nan ta gradecido na tur esnan cu, di un manera of otro, a contribui pa acerca e partidonan. Un otro punto cu a sali durante e declaracionnan ta importancia di educacion y concientisacion, mirando no solamente interes di e companianan, sino tambe interes di Aruba, naturalesa y futuro generacion.
Juan Carlos Espinal (AGW Tours): E resultado no mester mira como final di e proceso, sino como comienso di un dialogo caminda e partidonan por sigui scucha otro y traha na un balans cu ta beneficia Aruba. “Nos mester sinta hunto, scucha otro y sigui dialoga. Esaki no ta solamente pa companianan, pero pa Aruba, pa naturalesa y pa futuro generacionnan.”
Prome Minister mr. Mike Eman a expresa satisfaccion cu e decision, indicando cu esaki ta ofrece un oportunidad pa sigui traha riba un balansa entre proteccion di naturalesa y e continuidad di e actividadnan turistico. Minister di Turismo, Transporte y Labor, mr. Wendrick Cicilia, a destaca cu e sector di tour operators y tour guides ta un parti integral di e experiencia turistico cu Aruba ta ofrece. Minister di Vivienda, Infrastructura, Servicio Interno y Telecomunicacion drs. Rene Herde a agradici e operadornan di UTV’s/ATV’s cu a firma e protocol, reconociendo e esfuerso cu nan a haci durante hopi aña pa logra un espacio di dialogo. Cu e firma di e protocol, Gobierno y e UTV’s/ATV’s tour operators a reafirma nan compromiso pa continua e dialogo y desaroya e medidanan cu fortalece tanto e conservacion di nos patrimonio natural como un sector turistico sostenibel pa Aruba.
