Minister Rene Herdé, titular di Infrastructura:
ORANJESTAD (AAN)- Minister Rene Herdé, como titular di Infrastructura, a duna di conoce den entrevista cu Matutino DIARIO, cu gobierno a extende e ROPV pa dos aña mas.
E mester a caduca e aña aki, pero gobierno a extende pa dos aña pa haya mas tempo pa traha, pasobra nan no a traha pa prepara e cambionan.
E cambionan mester ta den consulta cu hendenan, no di yega hisa benta y haci e cambionan.
“E impresion den pueblo ta cu esey a sosode biaha pasa, cu el a wordo haci sin consulta y hopi hende no a realiza kico e impacto di ROPV ta. Awo cu e impacto ta conoci, e consultanan mester t’asina cu hende bisa cu awo nan tin un bista kico nan kier y kico no kier, y e departamento mester bay wak kico por y kico no por, loke nos kier na Aruba, pasobra Aruba no ta bay crece bira mas grandi”, Minister Herdé a señala.
E mandatario a expresa cu mester percura pa tin un balansa entre naturaleza di uso pa nos tur y uso economico, di otro industrianan.
“Unda nos ta permiti, kico y con. Turismo a tuma un espacio grandi, e ta nos pilar economico principal, pero toch nos mester percura pa tin’e na un forma cu e no ta acapara henter nos isla. Por ehemplo, henter e discusion tocante e uso di e UTVnan. Tur esey tin di haber con e areanan di nos pais, kico nos ta permti riba caya, kico nos ta permiti riba beach, unda nos ta permiti pa construi companianan nobo (por ehemplo si mañan mester lanta un compania pa traha bentana), unda e ta permiti, si e mester bay na Palm Beach of na Barcadera.”
Ministro a sigui bisa: “Cosnan cu ami mes ta preocupa p’e ta e zonanan rond di nos facilidadnan special, por ehemplo hospital. Mester percura pa rond di hospital tin suficiente espacio p’e por expande, pa bin cu servicionan nobo. Aworaki mes e espacionan na hospital ta hopi limita, mesun cos ta sosode cu Aeropuerto, ta conta pa waf, pa servicionan di polis, Douane mester tin suficiente espacio.”
“Na San Nicolas tambe, mester reserva espacio pa otro actividadnan economico. Y por ta, nos tin bista riba esey, pero mester reserva espacio pa den futuro por bin cu cosnan nobo. Esey ta cosnan cu den nos ROPV nobo, cu ta bay cuminza na 2028, nos ta bay percura p’e”, Minister Rene Herdé, titular di Infrastructura ta remarca.
