Parlamentario Marco Berlis, parti 1:
ORANJESTAD (AAN): Dialuna 25 di Maart den un conferencia di prensa gobierno a decreta e luna di April como e “luna nacional contra abuso di mucha.” E decreto importante aki ta marca otro decision importante di gobierno riba e tema delicado aki.
Conscientisacion y brinda informacion continuamente na pueblo ta importante pa preveni mas caso sucede. Abuso di mucha ta causa trauma y dañonan inmenso na muchanan, e famia y nos comunidad.
Aunke gobierno a tuma varios paso concreto pa acapara cu e situacion, estudionan ta mustra cu 99% di casonan di abuso sexual di mucha ta door di un miembro of conocir di e famia. Esaki ta haci cu nos como mayornan mester informa y papia mas cu nos yiunan y ekipa nan con pa evita y salba nan curpa den caso di un intento di abuso sexual. Mirando e importancia y urgencia, gobierno a dicidi pa decreta e luna di April e luna nacional contra e abuso di mucha.
Accion clave contra abuso di mucha
Gabinete Wever-Croes I y II, a bin ta trahando constantemente riba ley- y proceduranan pa percura pa castigo mas severo p’e abusadonan. Esaki a wordo logra na Juni 2020. Inmediatamente for di 2017-2024 por bisa cu a logra lo siguiente:
- A institui un Comision Nacional di Abuso di Menor;
- Bureau Sostenemi a bira Advies en Meldpunt Kindermishandeling (AMK) na 2019 y gobierno a institui un comision “Sexueel Misbruik Minderjarigen” bou liderasgo di sra. - Lisette Gomez, un persona dedica na e lucha contra abuso sexual di mucha;
- A introduci varios ley pa proteccion di muchanan: Ley di creche, ley di proteccion di mucha y hoben, ouderenplan;
- A inaugura Centro pa Hoben y Famia na 2020 pa yuda mayornan fortalece nan “parenting skills;
- A institui na 2021 e Departamento di Mucha y Hoben;
- A introduci FACT-team Kind en Jeugd di Sociaal Psychiatrische Dienst;
- A expande crisis opvang plekken na Fundacion Contra Violencia Relacional;
- Stichting Reclassering a establece su departamento di Jeugd reclassering.
Otro iniciativanan di Gobierno pa combati abuso di mucha
Asina tambe gobierno a introduci diferente otro cosnan pa yuda combati e problematica di abuso di mucha manera;
- A introduci un Meldcode, Codigo di Proteccion, y un curso di “Signs of Safety” pa profesionalnan den sectornan social, enseñansa, salud publico y husticia; pa asina tur profesional por raporta na forma uniforme y pa tur informacion relaciona cu e mucha ta central den un solo sistema.
- Family Justice Center, cursonan pa henter e veld social door di European Family Justice Alliance.
- Campaña nacional di “Mi Mesun Heroe:” un proyecto di 52 episodio educativo pa nos muchanan, pa conscientisa e muchanan desde chikito kico por, kico no por, y kico pa haci pa stop actuacionnan no permiti contra un mucha.
Di e forma aki mi a menciona algun di e cosnan cu gobierno a bin ta haci pa preveni y yuda cu e problematica di abuso sexual y abuso en general di mucha. Den mi siguiente articulo mi lo elabora hopi mas riba tur e otro logronan di gobierno den e area aki.
