Scandal Presidente Interino di Rekenkamer a bira un shock den Reino - *Nuboer a rementa un bom den realisacion acuerdo Aruba y Hulanda - *E tabata comanda proceso pa yega na veracidad di cifranan di Aruba
ORANJESTAD (AAN) — E scandal cu a wordo ocasiona dor di Frederick Nuboer tin impacto sumamente grandi pa Aruba na e momentonan aki.
Como Vice Presidente di e Colegio Alto di Estado, e tabata na comando di e aparato cu ta comanda e bon ehecucion di e proceso financiero di Aruba pa finalmente entrega Parlamento e loke ta bira cifranan veridico di e pais, cu ta e unico cifranan na cual Corte di Husticia lo tene su mes.
E informacion cu e Presidente di Algemene Rekenkamer Aruba a cay den man di autoridad pa su actuacion na momento cu e tabata burachi na un lugar publico, a cay manera un bom den e circulonan mas halto di Reino.
E trabou cu tabata wordo desplega dor di Frederick Nuboer como Presidente Interino di Algemene Rekenkamer Aruba, ta sumamente importante den e actual ehecucion di e Acuerdo entre Reino y Aruba, cu a bira necesario pa recuperacion di Aruba despues di e pandemia 2020 di Covid-19.
Frederick Nuboer como Presidente Interino di Algemene Rekenkamer Aruba, tabata comanda legalmente e proceso cu mester produci e prueba di veracidad di e unico cifranan oficial di Aruba.
E trabou di Frederick Nuboer no tabata solamente comando di e aparato cu mester a dicidi e bon uzo di placa di Pueblo sin mas.
Frederick Nuboer tabata reemplasa un Presidente di Algemene Rekenkamer Aruba, cu mester a garantisa e bon circulacion di placa den aparato gubernamental.
Un proceso legal di preparacion di presupuesto pa e momento cu Parlamento ta duna su aprobacion pa e Cuentanan Anual den cual e cifranan exacto cu a drenta y sali den e tur ramo di e aparato gubernamental, ta e unico produccion di cifranan veridico di e pais.
For di momento cu supervision Hulandes a bira un hecho na Aruba, e papel di Algemene Rekenkamer Aruba a bini dilanti y e trabou di Frederick Nuboer a entrega su persona un responsabilidad crucial na un momento di gran importancia pa e futuro di Aruba y hasta e posicion fuerte di Aruba den Reino.
E hecho cu Polis a detene un Presidente burachi di Algemene Rekenkamer Aruba, a cay ayera manera un bom den Reino, mas ainda debi na e hecho cu opositornan di supervision di Reino riba Aruba, semper a uza como argumento e existencia di Algemene Rekenkamer Aruba como controlador di integridad den e funcionamento di Aruba como Estado di Derecho.
Na e momentonan aki, Aruba mester pone e proceso pa yega na un Presidente nobo di Algemene Rekenkamer Aruba, na marcha.
Leynan ta regla Algemene Rekenkamer Aruba y tambe e proceso di solicitud habri pa yega na personanan cu ta forma e Colegio, cu ta e Presidente, e miembronan y e miembronan reemplasante cu no tin un trabou fiho na Algemene Rekenkamer Aruba.
E Secretario di Algemene Rekenkamer Aruba ta encarga cu e trabou diario di e Organo Halto y Independiente di Estado y ta dirigi e personal cu mester ehecuta e trabounan hancra den Ley, cu ta duna e Presidente di e colegio e papel di “comandante” di e Tribunal di Cuenta.
Pa Ley, Gobernador por a manda Frederick cas pa su mal conducta. E Ley cu ta regla e posicion cu e tabata ocupa, ta papia directamente di esaki, loke ta nifica cu si e no a entrega su retiro, Gobernador por a dicidi cu e ta bay cas.
