Despues cu mas di 25.000 maestro a bay den protesta
SAN JUAN: Un total di 25.000 docente di scolnan publico na Puerto Rico, incluyendo esnan cu ta den posicionnan transitorio, lo bay haya awor un aumento salarial di US$ 1.000 mensual entrante Juli 2022, despues di varios dia di protesta ehecuta pa e docentenan na varios area di e pais.
“Nos a logra di identifica fondonan federal pa haci realidad e aumento pidi di 1.000 Dollar pa luna pa tur maestro y maestra di nos sistema publico na Puerto Rico,” ta loke gobernador Pedro Pierluisi a bisa. El a bisa cu lo bay haci cu fondonan federal cu ta disponible te cu September 2024.
Den e sentido aki, el a bisa cu entrante Juli di e aña aki, envez cu e docentenan djis ricibi 235 Dollar mensual di aumento (cu tabata poni den e plan fiscal certifica), nan lo ricibi 1.000 Dollar di aumento. E diferencia ta cu e 765 Dollar extra aki lo bin di fondonan federal.
“Mi kier ta claro, protesta of no protesta, ami semper a scucha nan. Mi ta respeta nan manifestacionnan y mi ta balora nan reclamonan. Nan por ta sigur cu, mescos cu den e caso aki, mi lo sigui traha y busca alternativa pa logra atende e reclamonan di nos empleadonan y nos pueblo,” e gobernador a agrega.
Ta asina cu e Secretary of Education di Merca a encurasha gobernador Pierluisi pa usa fondonan federal pa mehora e salario di docentenan.
No obstante e aumento di salario aki, e docentenan tin keto bay un protesta masal planea pa awe Diaranson 9 di Februari.
E sindicato Federacion de Maestros de Puerto Rico a pidi e manifestacion di awe Diaranson, pa marcha for di parke Luis Muñoz Rivera na Puerta de Tierra te cu La Fortaleza pa 8:00 am, pa exigi “un pensiun digno” tambe.
Pues nan a mira cu aumento di $1.000 a wordo logra, y awor e docentenan ta exigi un pensiun digno tambe cu pa nan ta mas importante.
Mientras tanto, e president di Asociacion di Maestronan, Victor Bonilla a reacciona y a bisa cu e noticia aki ta representa ‘husticia’ pa e docentenan. El a bisa cu pa hopi aña nan a bin ta sperando e momento aki.
E protestanan di ultimo dianan aki a ocasiona ausencia masal di docentenan den klas. Diabierna cu a pasa tabata e dia cu como 72% menos docente a bay traha. E mesun dia ey tabatin un protesta masivo, unda na exigi mihor salario y mihor pensiun.
