ORANJESTAD (AAN): Gobernador di Aruba, Su Excelencia Alfonso Boekhoudt, riba diabierna 28 di januari 2022 a realisa un bishita di trabao na Fundacion Ambiente Feliz.
Ta trata di un cas di substitucion familiar estableci oficialmente na october 1986 pa personanan cu limitacion mental.
Meta di e organisacion ta pa yuda e clientenan, unda cu ta posibel, desaroya nan propio capacidadnan specifico y pa logra un posicion mas normal y igual posibel den e comunidad.
Señora Williams-Schmidt (Directora) y señora Suhail Croes (Hefe di Unidad Cas Briyante) a ricibi Gobernador Boekhoudt na su yegada. Señor Reuben Tjon Sie Fat a duna e discurso di bonbini.
Gobernador a asisti na un presentacion tocante con ta trata e clientenan y e trabaonan di e fundacion. Seguidamente a haci un recorido den e compleho, finalisando e bishita di trabao cu un foto dilanti di e edificio principal.
Potret: © Kabinet Gouverneur Aruba
