Desaroyonan mundial ta exigi stabilidad gubernamental Aruba awe
*Final di Cuaresma ta marca final di e temporada mas activo turismo
*Caida economico Venezuela, desaroyonan Mericano y defensa Hulandes
ORANJESTAD(AAN)—Un situacion mundial di gran preocupacion ta sigui manifesta su mes, mientras na Aruba e base di bon gobernacion, cu ta un Gobierno nobo, ainda no a wordo realiza.
Maart a alcansa su ultimo parti y April ta presenta pa Aruba, fechanan cu mester tene na cuenta.
Pasco Grandi, lo ta dia 20 di April. E ta sigui e siman di final di Cuaresma y e weekend special cu ta cuminsa cu Diabierne Santo y continua te cu e segundo dia di Pasco Grandi 21 di April.
Despues ta sigui na final di e prome siman di April, Dia di Rey, dia 27 di April pa sigui cu Dia di Labor dia Prome di Mei.
E temporada aki ta conoci tambe pa e hecho cu cambionan di condicionnan di tempo, ta nifica final di loke oficialmente ta wordo considera e temporada halto di turismo Mericano, cu na 2025 ta pidi mas atencion pa motibo di cambionan importante cu ta wordo introduci na Merca y cu lo afecta bida di e ciudadano Mericano.
Cu expertonan na e momentonan aki DIARIO ta vigilando tur desaroyo na Merca y sigur loke por tin impacto na Aruba, no solamente pa e cantidad di turista cu ta forma e base di economico di Aruba.
Teniendo cuenta cu e dependencia di Aruba di Merca, pa importacion di productonan di prome necesidad te e base economico di Aruba cu ta keda na prome lugar turismo, DIARIO ta siguiendo tur desaroyo Americano y pone resultadonan hunto cu e impacto riba Hulanda di cual Aruba ta depende como pais grandi di Reino, pero tambe Venezuela cu ta di influencia social directo pa Aruba.
Ora pone e factornan aki hunto, ta yega na e conclusion cu na e momentonan aki Aruba, ya mester tababta tin un Gobierno firme, cu un agenda conoci y acepta pa Parlamento pa atende cu loke tin influencia directo pa Aruba.
E situacion mundial ta haci cu mundo politico di Aruba, mester ensancha su base di discusion y atencion imediatamente y Gobierno di Aruba mester duna claridad di su maneho den e situacion actual.
Cu Aruba por wordo pone na riesgo, a keda demostra den e hecho cu durante gobernacion di Mike Eman, Aruba a entrega bienestar di su economia na Nicolas Maduro na momento cu mundo tabata busca Nicolas Maduro hasta pa ofensa criminal.
Aruba no por wordo entrega na ningun inseguridad na e momentonan aki, cu Merca ta introduciendo medidanan y cu ta bay afecta no solamente economia di e pais pero sin duda tambe prijsnan di articulonan Mericano cu ta wordo experta, cu tur resultado cu esaki lo tin pa Aruba, cu ta depende pa su parti mas grandi di mercancia Mericano, manera cifranan di importacion ta indica.
Aruba ta depende di Merca pa produccion di su economia cu ta depende di turismo, cu ta yegando na su normal di temporada di turismo basa riba fin di invierno (winter) na Merca.
Cuaresma generalmente ta marca e final di e temporada di Turismo sigur si tene cuenta cu Pasco Grandi, cu tanto na Merca, Europa y e region directo di Aruba.
April lo conoce pues diferente dia di fiesta, cu ta wordo celebra na Aruba y lo tin influencia comercial pa Aruba, loke tambe ta afecta e produccion nacional.
Pues Aruba ta den porta di un luna di cantidad di celebracion, pero tambe den porta di sucesonan importante manera na Venezuela, cu pa dos motibo ta den un situacion dificil.
Na prome lugar e prijs di petroleo mundial, cu ta cada mas abou den hopi tempo y segun expertonan mundial lo no bula na e prijsnan riba 80 Dollar pa baril manera tabata cobra te cu recientemente.
Esaki ta mishi cu e ingreso di Venezuela cu awor mester atende tambe cu e situacion di Venezolanonan cu mester bandona Merca, mientras na mes momento Chevron mester cera su portanan.
Na Merca, manera den pasado na varios occasion DIARIO a mustra, e actual posicion gubernamental ta, cu no ta sigui sostene e negoshi di petroleo di Nicolas Maduro. Presidente Donald Trump posiblemente lo duna permiso pa Chevron ta activo na Venezuela tres luna mas.
Informantenan clave ta segura DIARIO cu e necesidad pa gobernacion stabil y dirigi di Aruba ta mas importante cu nunca y cu mester termina cu formacion ya cu Hulanda tambe, ta den un situacion sumamente dificil.
E situacion financiero Hulandes mester di tur atencion di Gobierno Hulandes cu mester participa den un Europa cu a bay di acuerdo pa bay amplia su capacidad di defensa na un forma barcaro.
Manera a wordo trece dilanti no tin tempo mas pa incertidumbre pa Aruba den un situacion mundial sumamente alarmante.
Gobierno nobo mester sinta y dedica su mes completamente na medidanan pa asegura continuacion di bon maneho, adapta completamente na e riesgonan internacional.
