Prome Minister Evelyn Wever-Croes:
ORANJESTAD (AAN): Durante su bishita na Nacionnan Uni, Prome Minister Evelyn Wever-Croes a atende varios reunion di cual un hopi importante tabata esun cu a cubri e tema di infrastructura. Manera ta conoci, Aruba tin retonan grandi pa loke ta e mal estado di e careteranan. Esaki debi cu no tabatin un plan consistente pa mantene nos careteranan prome cu pandemia, y debi na pandemia, Gobierno a kita tur e fondonan cu tabata tin aloca pa mantencion di caretera, pa por a salba bida di hende.
Prome Minister a indica, cu awor cu Aruba ta recuperando, ta importante pa yega na un sistema pa toch structuralmente tin fondo aloca pa drecha e calidad di nos careteranan. Pero esey lo no ta suficiente.
Gobieno a pidi DOW y nos expertonan pa traha riba un plan di maneho pa den 10 aña drecha e careteranan na Aruba. Tambe ta importante pa menciona cu e careteranan di Aruba, actualmente ta wordo mas afecta door di e cambio climatico, ya cu ora awa yobe awor, e ta yobe mas severamente, causando asina cu e careteranan t deteriora mas lihe. Esaki ta e plan cu Gobierno lo kier presenta, como un plan di adaptacion pa cambio di clima.
Tambe, Premier Wever-Croes a reuni cu Global Island Partnership, sra Kate Brown y nan a compromete cu lo yuda Aruba cu e plan aki, pa asina nos logra haya un seyo di Nacionnan Uni riba dje. Si Aruba logra haya e seyo aki, e oportunidad pa haya fondo ta mas grandi, yudando nos asina
pa drecha e careteranan den menos di 10 aña.
