Suspension di detencion di ex-minister
ORANJESTAD (AAN): Riba Diabierna, a tuma nota cu Glenbert Croes no ta deteni mas, y a sali liber condicionalmente.
Segun Ministerio Publico, enberdad riba Diabierna 11 di October 2024, e mientras tanto ex-minister di Labor, Energia y Integracion, Glenbert Croes, a keda presenta dilanti di hues comisario como sospechoso den e investigacion Portulaca.
El a ser presenta dilanti Hues Comisario cu a revisa tur documento relaciona cu su detencion. El a nota cu e proceso con nan a detene, y priv’e di libertad tabata legal y cu e sospecho di asunto di soborno contra di Glenbert ta serio.
Pesey hues comisario a ordena e detencion preventivo di e sospechoso cu despues a worde suspendi.
Esaki ta nifica cu por lo pronto a laga Glenbert Croes den libertad, pero cu e tin mester na mantene su mes na algun condicion cu hues a impone riba dje.
Un di e condicionnan ta cu e sospechoso mester cumpli na yamadanan di polis y husticia.
E investigacion penal ta continua. Den interes di e investigacion cu ainda ta andando, Ministerio Publico na e momento aki no ta duna mas informacion.
