Provoca pa e cantidad di yobida...
ORANJESTAD (AAN): Hopi hende a bin ta riparando ultimo simannan, cu diripiente tin hopi sangura ta aparece ora cu solo a caba di baha, y tambe net prome cu solo sali.
Ta parce cu temporada di yobida cu normalmente ta start te fin di October, awor na 2022 a presenta su mes mas trempan. Esey ta debi na awacero cu a cuminza cay mas trempan e biaha aki. E yobidanan aki ta loke ta impulsa e problema di sangura na Aruba.
Esey ta loke Luis Chong, director di Gele Koorts Muskieten Bestrijding (GKMB) a indica den un entrevista. E peligro ta cu sangura na gran cantidad, lo por inclui e especie di Aedes Aegypti cu ta un vector pa malesanan manera Dengue, Zika, y Chikungunya.
Pesey mes, team di GKMB a sali caba cu nan equiponan pa haci control y fumiga den barionan. Pero alavez, e funcionarionan di GKMB ta suplica comunidad pa cuminza controla den bo cura, check e potchinan cu awa aden, check si bari of toternan di sushi tin awa aden, check hemchi cu por tin pafo, mira si tin sangura of webo di sangura aden.
“Por fabor, double-check esakinan. Cana rond di cas, y wak unda por tin awa cu ta keda acumula, pa asina bolter nan pa asina yuda elimina criadero.”
Chong a mustra cu nan ta premira un temporada pisa di sangura pa e temporada aki.
Considerando e hecho cu statistica ta enfoca cu e ‘piek’ di yobida lo bay ta November, December y Januari... nifica cu e lo bay ta un temporada hopi druk pa GKMB.
Loke nan ta haciendo extra, ta pa controla plasnan cu ta keda para na cierto caminda, unda awa por yuda forma criadero pa sangura, tambe ta bay check riolering den caya grandi, y lo keda toch cu e trabao di pasa cas-pa-cas pa controla. Claro cu ta sigui pidi comunidad pa nan mes tambe sigui haci control y elimina criadero di sangura na cas of na bo negoshi.
Si acaso bo ta hayando molester di sangura na bo cas, y bo a haci control rond di bo cas y no a haya nada, semper bo por yama Departamento di GKMB na 585-5533 pa nan por bay atende e situacion, como cu kizas e criadero ta banda di e cas (kizas na bisiña) of un lugar inaccesible, pa asina nan por yuda localiza y combati e criadero.
