Parlamentario Jennifer Arends-Reyes:
ORANJESTAD (AAN): Den cuadro di conmemoracion di Dia Internacional di Hende Muhe, cu e tema di e aña aki “Give to Gain”, Parlamentario y lider di Fraccion AVP, Jennifer Arends-Reyes, a comparti un mensahe cla: progreso real ta logra ora nos scoge pa duna -duna oportunidad, duna sosten y duna respet- pasobra solamente asina nos tur por gana como comunidad.
“‘Give to Gain’ ta recorda nos cu inversion den hende muhe no ta un gasto, sino un ganashi pa henter nos pais,” Arends-Reyes a declara. “Ora nos duna mucha muhe acceso na educacion, guia y oportunidad economico, nos ta creando liderazgo, innovacion y stabilidad pa futuro di Aruba.”
E parlamentario a enfatisa cu e tema di e aña aki ta invita tur sector di sociedad – gobierno, sector priva, organizacionnan social y comunidad – pa reflexiona riba kico nan por duna pa logra un ganashi colectivo. Segun señora Arends-Reyes, esaki por inclui:
(*) Duna mas oportunidad di capacitacion y formacion profesional pa muchanan muhe;
(*) Duna sosten activo na mama soltera y famianan vulnerabel;
(*) Duna prioridad na proteccion contra violencia domestico y abuso;
(*) Duna espacio pa emprendemento femenino y independencia financiero.
Arends-Reyes a subraya cu igualdad di genero no ta solamente un meta social, sino tambe un inversion strategico den desaroyo nacional. “Si nos duna confianza y recurso na nos hende muhenan, nan lo gana fortaleza y independencia. Y cu nan progreso, Aruba tambe ta gana.”
El a conclui cu Dia Internacional di Hende Muhe no mester keda na palabra so, sino bira un compromiso concreto pa sigui construi un sociedad unda cada mucha muhe tin oportunidad pa yega su maximo potencial.
“Give to Gain ta un mentalidad. Ora nos duna cu curason habri y vision di largo plazo, nos tur ta gana – como famia, como comunidad y como nacion.”
