Den un situacion mundial dramatico Aruba a haya oportunidad pa hari - Un protesta increibel a kibra hasta record di reconteneo voto secreto - Miguel Jose tambe un guerero den e trias politica di “verkapte verkiezingen”
ORANJESTAD(AAN)- Definitivamente mundo a drenta un orbita special. Momentonan grandi y sorprendente ta presenta nan mes na e ciudadano simpel, cu hamas den su bida lo a pensa cu e lo por ta biba den e temponan special cu ta anuncia nan mes na mundo.
Ayera un protesta increibel a wordo lansa dor di e alma inocente den politica, Gerlien Croes, representante di e partido berde den Parlamento.
E fiel siguidor di Mike Eman, cu prome cu Gerlien tabata ganador di e contest di personanan eternamente hoben y sorprendente, a laga Aruba den shock ora el a bay contra e hecho cu prome cu den Parlamento a tuma un decision kende ta bira Presidente di e colegio legislativo, ya formador Evelyn Wever-Croes a bisa kende lo bira e Presidente.
E protesta serio di Gerlien a pone curazon di hopi ciudadano dal un salto extra. Porfin un hoben ambicioso, un nobato en busca di perspectiva politico, a realisa cu e nombramento di un Presidente di Parlamento ta basa riba palabracion politico.
E posicion di Gerlien Croes a pone estadistanan tembla. Es mas. Tin coco cu a cay for di palo riba cabez di hende, cu nunca a realisa cu mescos cu durante formacion ta dicidi kende ta bira Ministro, durante formacion despues di eleccion ta dicidi tambe kende lo presidi Parlamento.
Gerlien Croes a laga Aruba asombra cu su reaccion. “Con por ta cu formador ta presenta e nomber di e Presidente di Parlamento?”
Un pregunta cu hamas hende lo a spera cu lo sali for di boca di un ser humano cu ta parti di mundo politico, cu despues di eleccion ta dicidi riba e puestonan cu e coalicion cu ta wordo forma mester yena.
E sorpresa di Gerlien Croes ta comprendibel. E ta prueba tambe cu de bez en cuando lider di un partido mester duna otro miembronan di e partido oportunidad pa bandona sombra di e lider y explora e realidad di mundo na forma independiente.
Gerlien Croes ta bini di e partido di Mike Eman, e homber cu a pone Aruba aplaudi e hecho cu el a priminti den eleccion cu e lo destrui e base financiero di Aruba. Gerlien Croes y Mike Eman por wordo mira como un solo identidad, un solo partido cu a bay cera un acuerdo cu Nicolas Maduro pa trece Citgo Aruba.
Gerlien Croes hasta ta wordo mira como un posibel sucesor pa Mike Eman, e homber cu a logra baha entrada di Aruba cu mitar pa bay tene huelga di hamber ora Hulanda a bati na porta.
Awe Gerlien Croes a sorprende Aruba. Formador di Gobierno a bisa kende ta bira Presidente di Parlamento.
Pio ainda. Gerlien Croes no tabata na haltura cu anualmente coalicion ta dicidi kende ta bira Presidente di Parlamento na final di e aña di Parlamento.
Gerlien Croes a duna prueba, si e informacionnan cu a alcansa DIARIO ta corecto, cu como Prima Donna di AVP e no ta na haltura, con Parlamento ta nombra Ministro, Presidente y Vice Presidente di Parlamento.
Ayera DIARIO a cuestiona pakico mester di un fondo pa asisti Miembronan di Parlamento pa nan haci nan trabou.
Despues di e asombro di Gerlien Croes, nos ta kere cu mester di diez fondo pa asisti Miembronan di Parlamento cu no sa con henter e sistema ta funciona y con ta nombra Presidente di Parlamento y Ministronan segun e sistema di “verkapte verkiezingen”, eleccionnan indirecto pa gobernacion di e pais.
Adelante Gerlien! E hit di nombramento di Presidente di Parlamento a kibra hasta e record di AVP di bay presenta un caso pa reconteo di voto pa Huez, cu a considera nan prueba un base pa un caso penal riba su mes! Tremendo!
Pero ora Aruba a kere cu Gerlien ta solito den su inocencia a resulta cu Miguel Jose Mansur tambe a protesta pasobra coalicion, e mayoria di Parlamento a dicidi kende ta bira Presidente di Parlamento!
Awor loke ta resta ta, cu nan ta bay protesta e forma cu tur Ministro y Presidentenan di Parlamento a wordo nombra den historia di Aruba cu a pasa un rato sumamente ameno cu e sabiduria di e almanan inocente Gerlien y Miguel Jose!
