Despues di a lansa acusacionnan falso contra su persona
- Pregunta surgi si Miembro di Parlamento no ta prepara pa reunion
- Pa controla Gobierno Parlamento mester investiga prome cu papia
ORANJESTAD (AAN): Diahuebs e topico di dia a bira un incidente sumamente lamentabel den Parlamento, cu a reuni pa atende e plannan di Gobierno pa e planta di purificacion di awa na Bubali.
Ta trata aki di un topico sumamente importante pa Aruba, cu mester a topa den Parlamento cu e maximo seriedad y preparacion di Miembronan di Parlamento, cu na nomber di Pueblo di Aruba mester controla trabou di gobernantenan.
Pa Miembronan di Parlamento cumpli cu nan deber, nan mester busca tur informacion necesario pa haci nan trabou debidamente.
Ta pa duna miembronan di Parlamento tur oportunidad pa haci nan trabou, a percura pa Miembronan di Parlamento ta ricibi pago substancial pa nan trabou den Parlamento.
Den pasado representantenan di Pueblo di Aruba no tabata conta cu pago pa nan trabou pero solamente un compensacion, ya cu tabata trata di un Puesto di Honor na sirbishi di Pueblo.
Loke a pasa ayera tabata inacceptabel y e actuacion di e Miembro di Parlamento Gerlien Croes, no a duna prueba cu el a studia e materia manera por a spera.
Diahuebs atardi, Prome Minister Evelyn Wever-Croes tabata den Parlamento pa trata e ley di RWZI.
Durante e reunion aki, y durante un entrevista pafo di Parlamento, Parlamentario Gerlien Croes a lansa acusacionnan falso contra Prome Minister y su famia, indicando cu su persona ta purbando na pasa e ley aki lo mas lihe posibel, pa asina enrikese su mes y su famia mirando cu Arulex Trust ta e representante di e compania cu lo bay tuma over e proyecto importante aki.
Prome Minister a indica cu e acusacionnan aki ta completamente falso, y cu ta un situacion bochornoso pa scucha un parlamentario hoben asina, saca tanto mentira for di su boca, mustrando asina cu e no ta nada diferente di partido AVP sino simplemente e "verlengde".
"Mi kier a enfatisa cu e acusacionnan aki ta falso, y cu cosnan sushi asina por sali solamente di un persona cu talbes tin envidia. Mi tata ta un hende di 82 aña, y ta un homber respeta den comunidad pa locual el a haci pa Aruba y pa su carera profesional. Ya ta 2 aña cu el a baha cu pensioen, y 2 aña cu e no tin ningun lazo ni cu Arulex Trust Services, ni cu e bufete di abogado Croes Wever Ruiz.
E nomber Croes ta keda den e nomber di bufete di abogado aki, pa respet pa tur e añanan di trabou cu mi tata a eherce. E fam Wever ta di señor Rudy Wever den felis memoria, cu a fayece na 2007, pero pa respet a mantene e nomber aki, mirando cu nan ta esnan cu a funda e compania aki" Prome Minister a splica.
Prome Minister a tuma su tempo pa splica e situacion actual aki cu prueba. Y mirando e hecho cu Parlamentario Croes a ripiti e palabranan aki pafo di Parlamento, informacion ta indica cu Prome Minister lo cana e caminda pa Ministerio Publico pa kehe pa difamacion y cuminsa un caso di rectificacion contra su persona.
Despues cu Prome Minister a desmenti e acusacionnan contra su persona haci pa Parlamentario Gerlien Croes, y a splica e berdad pa loke ta trata su relacion cu Arulex Trust Services, y cu e bufete di abogado Croes Wever Ruiz, Parlamentario Gerlien Croes a pidi disculpa y a rectifica e acusacionnan cu el a lansa na Prome Minister.
Por papia aki di un incidente sumamente serio cu a tuma lugar den seno di e maximo representacion di Pueblo di Aruba ayeratardi.
