Diego de Cuba, presidente di STA, ta denuncia:
ORANJESTAD (AAN) – Presidente di Sindicato STA, Diego de Cuba, a duna un declaracion na prensa, unda e ta denuncia cu AAA N.V a cuminza ataca su delegadonan.
Triple A, segun de Cuba, algun luna pasa a ataca un di su delegadonan y mester pone un stop na e situacion aki, y pesey STA a lanta un caso den Corte.
“Despues di varios luna e Kortgeding a tuma lugar, y dia 7 di September ultimo, Huez a dicta sentencia y den e sentencia aki Huez a bati dede di Triple A, NV, basta fuerte den Sala di Corte”, de Cuba a declara. No obstante esey, e lider sindical a agrega, Triple A kier insisti pa continua actua contra e delegado en cuestion, sin motibo ni razon, y a lanta un Caso contra dje.
“E hecho cu nan ta keda bati riba dje ta algo cu, puramente, a sosode den e persona aki su bida priva y cu ningun hende tin algo di bisa den esey, y Huez a bisa tambe den su veredicto cu un persona su bida priva ta sagrado”, de Cuba a subraya.
El a agrega cu e persona aki ta un empleado cu ta eherce su trabao manera mester ta, cu un trayectoria sublime, y e comunicacion cu su coleganan ta tremendo. A base di tur informacion presenta na Huez, e no por a conclui nada otro cu esaki ta un persecusion personal y den e bida priva di e empleado aki.
Diego de Cuba a menciona cu despues cu Sindicato STA a lanta e caso aki a haci un apelacion na Triple A, pa nan stop cu e bagamunderianan aki, pero e lider hefe di e team ta haci manera e ta doño di e compania.
Durante e caso den Corte tin varios documento cu a wordo presenta, unda cu Departamento di Recurso Humano ta basa su mes riba puro redashi, anto nan kier mantene e nomber di e persona cu a haci declaracionnan anonimo, locual por mantene asina, pero ora di bin cu e stucknan aki den Sala di Corte, ta bira publico. “Y kico ta mas tristo? Cu den e documentonan aki ta aparece nomber di empleadonan cu aworaki ta ripara pakico nan a wordo perhudica, pa nan por a haya cierto promocionnan den e compania, a base di declaracionnan di cierto coleganan di nan mes, cu ta basa puramente riba redashi”, de Cuba a reitera.
Diego de Cuba a subraya cu un di e obhetivonan cu e director di Triple A, a bin cune ta integridad. “Anto, mi kier a puntre si redashi ta parti di su integridad, si e ta basa su mes riba redashi”, el a acentua.
De Cuba a papia cu e director di Triple A tur locual cu ta pasando, y a bise tambe cu despues cu e caso a tuma lugar den Corte, nan no tin pia pa para riba dje, y cu e caso cu nan ta insisti di lanta contra e empleado nan lo bay perde. E caso aki lo tuma lugar dia 29 di September den Corte.
De Cuba a subraya cu e asunto aki ta bergonzoso, pa un compania manera Triple A NV. Y cu tin hendenan den DRH cu ta interoga cierto empleadonan, anto uza nan declaracionnan den Core anto mantene anonimo. “Den Corte bo no por mantene nada mas anonimo! Bo tin cu basha abao, y bay bisa ken ta e persona ey cu a haci e declaracion y e tin cu bin cu prueba”, Diego de Cuba a subraya.
