*Bon boluntad di dunador di trabao ta resalta!
ORANJESTAD (AAN)—Recientemente a tuma lugar e firmamento di e Contrato Colectivo nobo (CAO) pa e periodo 2023-2024, pa e trahadornan di e compania Air Navigation Services Aruba N.V (ANSA), afilia na e Federacion di Trahadornan di Aruba (FTA).
Den e acto protocolar di firmamento, di parti di Gerencia di ANSA a firma Nilky Kock y di FTA su presidente Jose Figaroa y Ryan Giel.
Nilky Kock a hiba palabra, na prome lugar, y a splica cu nan a negocia pa un lapso di mas of menos siete pa ocho luna, cual na cuminzamento no tabata facil, el a wordo rechaza, pero un par di siman pasa nan a logra yega na otro despues cu nan a bin bek na mesa.
Ambos partido a tira awa den biña y na final nan a logra di yega na un acuerdo cu ambos partido ta sinti bon cu ne.
“Un acuerdo cu, den nos bista, ta un ‘win-win’ pa ambos partido; tumando na cuenta e circumstancianan actual di e compania, e perspectivanan cu tin pa e siguiente añanan, e ta un bon deal. P’esey nos ta contento cu mayoria di e miembronan di FTA a vota na fabor di esaki, y mi ta kere cu e ta pone un base tambe pa nos por sigui y crece como compania. Un di e puntonan cu mi ta kere ta bunita den e CAO aki ta, tambe, cu ora nos a yega na un acuerdo di parti di gerencia toch a dicidi, y den consulta logicamente cu FTA, pa agrega den e CAO, algo extra pa e trahadornan condiciona si, cu si e situacion di e empresa sigui mehora, cu nos entradanan ta mehorando, manera nos ta wak desde September, y si e lo continua e prome tres lunanan di 2024, nos lo paga un bono adicional, na e trahadornan. Mi ta kere cu esey ta bunita”, Kock a expresa.
El a gradici tur esnan cu a tuma parti den e proceso, tambe Minister Arends pa e sosten, na Hunta di Comisario pa e consehonan y pa ta envolvi, y pa e aprobacion di e CAO nobo aki. Tambe el a gradici e team di negociado ya cu e mes a tuma un participacion den background, pues tras di cortina, y logicamente FTA pa nan pasenshi y sabiduria con a hiba e proceso aki. Y finalmente, e trahadornan di ANSA cu a duna sosten den gran mayoria na e CAO exitoso aki.
