Lider politico cu mayor sosten lo goberna for di Parlamento
*E realizacion di Status Aparte ta prueba di forza di Parlamento
*Wilders mester proba cu e por ta lider di Pais den Tweede Kamer
ORANJESTAD (AAN) — Uno di e logronan mas grandi di Betico Croes, cu sin duda tabata sumamente importante den e lucha di Status Aparte, ta e hecho cu Betico Croes a dirigi mundo politico Arubano, for di Eilandsraad di Aruba y Parlamento di Antia Hulandes.
Consehero di Bestuurscollege di Aruba, Betico Croes den e realizacion di Status Aparte di Aruba, a para firme den e posicion cu el a alcanza pa medio di voto directo di e Pueblo di Aruba y a entrega e prueba cu Parlamento ta e Voz Real di Pueblo y cu tur poder pa percura pa gobernacion ta di acuerdo cu deseo di Pueblo.
E posicion di Betico Croes den Parlamento di Aruba y den Parlamento di Antia Hulandes, a haci posibel pa e organonan cu Pueblo a eligi directamente, por a exigi con gobernacion mester ta, pa asina alcansa loke Pueblo ta desea y ta bienestar di Pueblo.
Tin un punto cu ta uni Betico Croes cu Geert Wilders. Betico Croes a lanta para pa un Aruba cu meta principal pa sirbi e interes directo di e Arubiano, cu mester a logra gobernacion propio pa dicidi riba su futuro cu mester a produci logro directo pa e Arubiano na prome lugar.
Geert Wilders, cu lamentablemente no tabata tin e habilidad y charisma di Betico Croes pa haci mundo comprende e autenticidad di su lucha, a lanta para pa un Hulanda nobo y pa ta sumamente franco, a presenta diferente punto riba su agenda politico, cu ta cuadra cu cambionan cu Hulanda mester conoce pa asina gobernacion di Reino y di Hulanda, cumpli cu e sistema politico cu na prome lugar mester busca e bienestar nacional.
Esaki por sona poco duro, pero e ta berdad di democracia, cu ta exigi di su dirigentenan pa den tur situacion, opta na prome lugar pa e bienestar y integridad di e pais y su ciudadanonan.
Ora mira atras, Betico Croes sigur na prome momentonan, tambe tabata confronta oposicion na Aruba y den exterior, di personanan cu no kier a atende cu e necesidad grandi, pa percura pa Aruba na prome lugar por a sirbi interes di Aruba y di e Arubiano, manera hasta e huramento di un representante di Pueblo y di un gobernante ta exigi.
Un politico cu ta atende bienestar di su Pueblo cu firmesa, mester honra e base internacional di democracia y bienestar di tur ciudadano, e integridad y bienestar di e Pais.
Si Betico Croes a nenga di mara su mes na participacion den gobiernonan, el a mantene e posibilidad pa e Voz di Pueblo resona den Parlamento, caminda realizacion di e deseo di Pueblo tabata hancra.
Problema di Geert Wilders ta, cu e no tin e don natural di Betico Croes pa dirigi un lucha y sigur te na e momento cu eleccion a haci su persona lider politico na Hulanda, no por a convence mundo di e autenticidad di su lucha.
Ora analisa e situacion na Hulanda, ta topa cu e realidad di un Gobierno Hulandes cu continuamente tabata busca aplauso di mundo cu tolerancia riba tur tereno, pero no a pone na prome lugar e Hulandes cu su necesidadnan basico como ser humano.
Hulanda, uno di e paisnan mas rico na mundo, no a uza su potencial financiero y economico na prome lugar pa atende e problemanan Hulandes comun y coriente.
Manera DIARIO a splica, varios punto di Geert Wilders ta na bienestar directo di e Hulandes.
E pregunta grandi ta keda, si Geert Wilders mes no ta opta pa no drenta Gobierno di e pais, pero asumi e poder grandi cu Tweede Kamer, Parlamento, ta entrega un politico den nos sistema gubernamental pa exigi pa Voz di Pueblo ta e Voz di Dios.
Manera DIARIO for di hopi tempo ta indica, mundo a subi caminda di cambio grandi. Sistemanan politico mester honra directamente e bienestar di Pueblo, cu Betico Croes a alcansa for di Parlamento di Aruba.
Con Geert Wilders lo por sa di uza e les politico cu Betico Croes, como e lider grandi di Reino Hulandes for di Segundo Guera Mundial, ta keda awor e pregunta.
Betico Croes a logra reforma Reino y entrega cada pais den Reino e hermentnan pa sirbi bienestar di Pueblo directamente for di Parlamento.
Awor Geert Wilders mester demostra si for di Parlamento Hulandes, e lo por busca e bienestar di Reino Hulandes total cu ta encera e bienestar di Aruba tambe, aunke Reino no conoce un Parlamento di Reino, pero un Gobierno di Reino.
For di Parlamento Geert Wilders, cu ainda tin e apoyo electoral mas grandi na Hulanda, lo dirigi Gobierno Hulandes y Gobierno di Reino.
Betico Croes a duna prueba di resultadonan cu e lo por alcansa. Palabra ta keda na Geert Wilders mes, cu mester entrega prueba cu e ta lider!
