ORANJESTAD (AAN): Durante siman, director ing. Edwin Jacobs di AZV a tene un conferencia di prensa pa asina duna un informe di e relato financiero 2021, y tambe di e retonan cu tin e siguiente añanan.
E director a elabora extensivamente riba varios cifra manera e desaroyo di cantidad di aseguradonan, e gastonan di cuido, entradanan, e resultado di e “Wave 5 model”, e gastonan di administracion, e diferente specialismonan y e proyecto plan di implementacion 2022.
Cu cifranan su dilanti, ing. Jacobs a mustra cu e relato oficial ta indica cu e gasto di remedi na Aruba, a keda casi mesun nivel.
Pues e gastonan di remedi ta mustra un desaroyo basta constante. Alrededor di casi 59 miyon Florin pa aña den e ultimo tres añanan.
Den 2021 e gasto cu AZV a paga na remedi tabata 58.5 miyon Florin.
Locual tabata un desaroyo tabata cu pa 1 luna a introduci e cambio den lista di remedi pero despues esaki a worde posponi. Awor ta den otro version di trayecto pa implementacion pero canando e trayecto aki hunto cu e stakeholdersnan.
Gastonan di ImSan: Pa Instituto Medico San Nicolas (ImSan) ta conta igual cu Dr. Horacio Oduber Hospital.
Esta cu OE AZV ta paga un lumpsum y ta haya diferente servicio pa esaki, entre otro di ambulance, tratamento pa wowo y dialyse. Na 2020 a trata caba algun asegurado via radioterapia y na 2021 a sigui.
Loke ta trata desaroyonan, aki por wak cu tin e “omgekeerde Uitzendingen” unda antes tabata manda asegurado exterior pa cierto tratamento, awor esaki por na Aruba por ehempel pa ‘strabismus’ (operacion di wowo skel). Adicionalmente a habri 22 cama tipo ‘short stay’ na ImSan.
