El a yega na 335,7 cent pa liter
ORANJESTAD (AAN): Ora cu hopi hende tabata anticipando cu prijs di gasolin lo bay baha durante luna di Juli, a bin resulta cu nada di esey lo bira realidad.
Siendo cu na otro paisnan den Caribe, incluyendo St. Maarten caminda Diabierna pasa a baha prijs di gasolin cu 13 cent pa liter. Ata Aruba ta haci anuncio cu entrante awe Diaranson 13 di Juli 2022, cu prijs di gasolin ta subi cu 14,5 cent pa liter.
Asina mes! Prijs di Gasoline Unleaded Premium na Aruba ta subi cu 14,5 cent, pa wordo bendi awor na 335,7 cent pa liter.
Prijs di Diesel LS ta subi cu 22,4 cent, pa wordo bendi awor na 312,7 cent pa liter.
Prijs di Kerosin ta subi cu 13,5 cent, pa wordo bendi awor na 291,1 cent pa liter.
Esaki a bira e prome biaha den historia di Aruba cu gasolin a yega na 335,7 cent pa liter. E biaha aki, Gobierno no a duna ningun splicacion di con a sigui hisa e prijs aki.
Prijs di crudo cayendo: E anuncio a bin net riba Diamars, ora cu prijs di crudo (WTI) a baha for di $102 pa bari, y cay te na $96 pa bari.
Siman pasa, e mesun crudo aki tabata casi $105 pa bari. Analistanan ta mira cu demanda pa combustible ta cayendo, y esaki ta pone cu e prijs pa crudo tambe ta sigui e mesun rumbo.
Pesey mes e siman aki, prijs di crudo ta cayendo basta rapido.
Prijs na otro islanan: Manera cu DIARIO a anuncia caba, desde Diabierna siman pasa, e prijs na St. Maarten pa Gasolin Unleaded ta awor na 301,4 cent pa liter. Diesel na St. Maarten ta na prijs di 292,9 cent pa liter.
Na Curaçao, aworaki prijs di Gasolin Unleaded ta awor na 295,1 cent pa liter. Prijs di Diesel na Curaçao ta 250,8 cent pa liter.
Na Republica Domincana, prijs pa Gasolin Unleaded ta keto bay congela door di Gobierno, cu ta absorbando tur accijns. Nan ta bende aworaki na 254,5 cent pa liter. Diesel pa e Dominicanonan ta na solamente 192,1 cent pa liter.
Pues si bo tuma nota di tur esaki, e prijs di gasolin na Curaçao ta aworaki 40 cent pa liter, menos compara cu Aruba.
