ORANJESTAD (AAN): Despues di a bishita e.o. Bonaire y Curaçao, awor e beyeza Danes,
esta señorita Victoria Kjӕr Thelvig lo ta na Aruba di Diabierna 13 di Juni te Diamars 17 di Juni 2025.
Manera tur ta corda, e modelo aki procedente di Dinamarca a ser corona na November 2024 na Mexico City, como Miss Universe 2024.
DIARIO a ricibi informacion, cu e organizacion local di My Dream Institute Foundation Aruba tin e honor di por ricibi’e y yame bonbini na Aruba. Nan tin un programa extenso prepara p’e pa e 5 dianan cu e lo ta na Aruba.
E ta yega dia Diabierna atardi cu Divi Divi Air. Nan ta invita henter pueblo di Aruba pa ta presente Diabierna dia 13 di Juni 2025 pa 4:30 pm na Aeropuerto Internacional "Reina Beatrix", na Arrival. Nan ta pidi pa bin cu Banderin chikito di Aruba pa asina por yam’e bonbini y lage sinti e calor di nos pais y nos hendenan.
Ban hunto ricibi Miss Universe 2024 di un forma cordial na nos dushi Pais.
