Parlamentario Evelyn Wever-Croes:
Poniendo observacion di ARA den contexto:
- Fase a yuda 12.246 persona cu a perde trabou den pleno pandemia
ORANJESTAD (AAN): Contraloria General (Algemene Rekenkamer – ARA) a emiti su relato pa aña 2020. Den e relato aki, ARA ta haci algun observacion critico riba e maneho cu Gabinete Wever-Croes II a hiba na aña 2020. ARA ta indica cu Gabinete Wever-Croes, durante pandimia a haci pagonan di Fase prome cu e ley a keda cla.
Parlamentario Evelyn Wever-Croes a remarca cu ta importante pa pone e observacionnan aki den contexto. Den aña 2020, tawata e aña di pandemia Covid 19. Na e momento ey, no tawata tin un ley cla riba con pa atende cu un crisis di e magnitud aki. Sinembargo, un cos tawata sigur pa Gabinete Wever-Croes, mester yuda nos ciudadanonan cu urgenica pa asina famianan por sobrevivi e crisis mundial aki.
Inmediatemente despues cu a keda conoci cu Covid a drenta Aruba y mester a cera fronteranan, a bira conoci cu esaki lo tin un impacto hopi grandi pa nos pais. Ex-Minister Glenbert Croes despues di a haya cifranan concreto di cuanto hende lo wordo afecta, a informa Ex-Prome Minister e tempo ey. Mas di 12 mil persona lo sufri e consecuencianan, perde trabou mientras cu no por wordo yuda a base di e leynan existente di ondertand.
Esaki a conduci cu e gobierno e tempo ey, mester a desaroya un plan cu urgencia, esta Fase. A reuni cu profesional y conseheronan pa encamina e ley aki. Gabinete Wever-Croes a ehecuta e maneho di Fase, haci e pagonan na e ciudadanonan afecta mientras ta warda e ley keda cla, teniendo cuenta cu e proceso burocratico largo pa keda cla cu e ley.
Parlamentario Wever-Croes a enfatisa cu Fase a yuda 12.246 persona cu a perde trabou door di e pandemia. Cu e placa aki, e ciudadanonan por a cria nan famia tur fin di luna.
“Si mi mester haya mi un biaha mas den un situacion asina cu, caminda cu mester yuda hende pa nan yega na un entrada pa mantene nan famia of warda e ley keda cla, mi lo scoge pa ehecuta e vision mientras ta percura pa e ley keda cla”, Parlamentario Wever-Croes a enfatisa.
Mientras tanto, el a remarca, e ley a keda cla na juli 2022, un aña y mey despues, y esaki a cubri e accion y vision aki di Gabinete Wever-Croes. El a agrega cu no tin niun acto illegal cu a tuma luga solamente cu dia cu a cuminsa haci e pagonan, e ley no a keda cla ainda. “Despues di un aña y mei, e ley a keda cla y ta cubri e pagonan cu a ser haci den pleno pandemia, pa asina mas di 10 mil ciudadano tin placa na fin di luna pa cria nan famia”, Parlamentario Evelyn Wever-Croes a enfatisa.
