ORANJESTAD (AAN): E cartera di Energia a cay bou maneho di Prome Minister Evelyn Wever-Croes durante 4 aña largo durante Gabinete Wever-Coes I.
Den reunion di Parlamento dialuna 13 di december pa trata e tema di Eagle LNG y WEB, Prome Minister a enfatisa cu e acuerdo aki a cana su caminda manera debe ser, y ta contene varios beneficio pa Aruba. Prome Minister a cuminsa su disertacion den Parlamento enfatisando e manera integro cu el a traha cu tawata contrario cu e maneho cu e ex mandatario a traha.
“E trayectoria a tuma luga durante cu ami tabata e Minister encarga y mi ta kere cu ta mas cu husto pa trece esaki padilanti pa asina mustra con nos ta funciona den nos gobiernonan”, Prome Minister a enfatisa.
Prome Minister a duna di conoce cu na 2017 cu el a haya e cartera di energia, mas bien el a encontra un cartel di corupcion bou di Gobierno di AVP. E unico cos cu e Gobierno di AVP a haci cu nos companianan estatal tabata uza nan como grabbelton pa nan por gasta placa y manda periodistanan bay biaha cu nan y pa publica propaganda. Nos ta cora e propaganda di ex prome minister cu a costa miles di dollar pa su cara sali den un articulo na Merca.
Prome Minister a haci un invitacion na Parlamentarionan nobo, especialmente esnan di oposicion, pa lesa e rapport di forensic di RDA pa nan sa ta cu ken nan ta haciendo complot. E hendenan aki di AVP, por wordo compara cu un cartel di corupcion y e rapport di RDA ta prueba esaki di pagina 1 te na e ultimo pagina.
“E forzanan cu awe ta bringa nos, ta parti di e cartel ey. P’esey mi kier alerta Parlamento cu tin hopi forsa andando aki tras. Forzanan cu nos ta bringando 4 aña caba y cu tabata tin man liber durante 8 aña di Gabinete Eman, Gabinete di corupcion den e cartel di corupcion”.
Gabinete Wever-Croes I, bou maneho di Prome Minister Evelyn Wever-Croes, a introduci ‘corporate governance’ como punto principal den su maneho di integridad y caba cu metemento politico. E vision tabata pa crea un situacion na Aruba pa libra nos futuro generacionnan di e coruptonan di AVP y tur cu a sostene nan.
Gabinete Eman I Y II a percura pa corompi nos companianan estatal, casi manda nan bancarota. RDA a genera Awg 20 miyon den apenas un aña y mei cu a bay den nan saco. Gabinete Wever-Croes I a stop esaki. Metemento di politica den companianan estatal mester termina.
Prome Minister a enfatisa cu den 4 aña di su maneho, y esaki directornan di companianan por verifica, e no a yama directornan di companianan contrario na e prome minister anterior di gobierno di AVP si tawata haci pa pusha su campañadornan. Tampoco Prome Minister a pidi niun compania pa paga pa propaganda den revistanan caro manera si nan mester a haci pa e prome minister anterior. Y mas ainda, nunca Prome Minister a pidi niun compania estatal pa paga biahenan di periodista pa nan biaha cu ne y cubri su pasonan den exterior. Esaki, lamentabelmente, tabata custumber di Mike Eman y su ‘corupte bende’.
Prome Minister a duna di conoce cu su maneho riba e tereno di energia, ta documenta den su relatonan annual di su ministerio. E relatonan aki por wordo haya online pa asina tur hende por wak kico a wordo haci riba tereno di corporate governance pa companianan estatal. Transparencia y bon gobernacion desde inicio di su maneho tabata tin prioridad pa Prome Minister Evelyn Wever-Croes.
