E decision di Gobierno di Reino ta entrega Aruba confiansa
*Gobierno di Reino a dicidi entre Gabinete Wever y supervision
*Statuut ta sostene continuacion gobierno den crisis mundial
ORANJESTAD (AAN) — Awe un analisis historico ta wordo skirbi. Un analisis cu ta basa riba e decision di Gobierno di Reino, si e actual Gobierno di Aruba ta capaz pa hiba Aruba pa un futuro nobo den e crisis mundial.
Pa comprende e importancia di e decision cu a wordo tuma den Conseho di Ministro di Reino ayera dia 21 di October 2022, mester bolbe na Statuut, cu ta decisivo den relacionnan entre e paisnan den Reino.
Ayera, Reino Hulandes a wordo recorda, cu tin palabracionnan fiho con e union di paisnan den Reino lo funciona y na kico nan mester tene nan mes.
Statuut mester garantisa cu ningun di e paisnan cu ta forma parti den Reino por pone e otro paisnan na peliger riba ningun tereno y pa medio di ningun areglo cu tin den Reino.
A keda demostra cu mal maneho di un pais den Reino, manera tabata e caso cu Aruba sigur entre 2009 y 2014, tin resultado pa henter Reino tambe cu mester yuda evita cu e paisnan oficialmente ta cay den un situacion di bancarota.
Statuut a duna Reino e arma, pa actua den sosten di exigencianan pa bun bon maneho pa asina e balornan basico y e constituciondi Reino por wordo honra den e relacionnan.
Reino por interveni y supervisa un pais cu ta na peliger financiero y esaki a socede cu Aruba na 2014 y ta motibo di existencia di Caft, cu ta encarga na percura pa un bon maneho financiero pa e pais.
Ora analisa kico a pasa ayera den Conseho di Ministro di Reino, por mira con Reino Hulandes a bay contra di e decision di Caft pa kita e decision pa Presupuesto 2022 for di Aruba y cu instruccion na Gobernador, exigi Aruba cambia su cifranan manera Caft ta exigi.
Cu otro palabra, Conseho di Reino no a honra e peticion di Caft contra Gobierno di Aruba na opinion di Gobierno di Reino, cu ta consisti di tur e Ministronan Hulandes hunto cu e Ministronan Plenipotenciario di e paisnan Hulandes den Reino.
Mester trece esaki dilanti, pasobra na e momentonan aki Hulanda ta pasa den un situacion cu no ta permiti Hulanda, crea peligernan y mas obligacion pa Hulanda den e parti Caribense di Reino Hulandes.
Na un momento di crisis mundial, cu planeta Tera den un situacion sumamente dificil, Reino Hulandes ta yega na e conclusion cu e exponentenan di MEP y RAIZ cu ta forma Gobierno Evelyn Wever-Croes 2, ta capaz pa dirigi Aruba sin intervencion di Reino.
Esaki ta nifica cu Reino ta scrap ponencianan cu Gobierno Evelyn Wever-Croes ta incapaz pa haci su trabou y mas bien ta confirma capacidad di Gobierno Wever-Croes 2, pa dirigi Aruba.
E decision aki ta uno di sumo importancia den e relacionnan den Reino y hopi hende a pensa cu Reino lo no laga Caft cay y lo a exigi Aruba pa actua manera Caft a bisa cu mester socede.
Pa Reino Hulandes a tuma e decision aki, e mester tin siguridad cu Gobierno Wever-Croes por haci e trabou cu ta nifica basicamente cu Gobierno Wever-Croes ta capaz pa hiba Aruba na un futuro nobo, na un mihor futuro na momento cu mundo ta practicamente den un guera mundial y ta confronta crisis grandi manera di petroleo, economico, financiero y social.
Ora analisa e panorama mundial y e retonan pa futuro mescos cu Statuut, e decision di Reino ta motibo pa Aruba lanta para y aplaudi Gobierno Wever-Croes 2, cu a marca historia pa Aruba.
