2023 ta entrega Evelyn Wever-Croes reto como lider nacional
*Peso di debe nacional ta topa cu e desafio di recesion y inseguridad
*Surplus di 63 Miyon ta cende un luz pa Aruba den un mundo scur
ORANJESTAD(AAN)—“Si Aruba a pensa cu e pais a conoce su etapa mas exigente, Aruba mester prepara su mes pa un futuro den cual ingredientenan importante cu a scapa Aruba di hoga for di 2017, lo ta central.”
Tur informacion local y internacional (cu ta intimamente mara na otro) ta mustra den e direccion di retonan grandi y di un gobernacion fuerte cu ta duna Pueblo confiansa pa sigui dilanti.
“Loke ta spera Aruba y henter mundo no ta nada facil. E puntonan mas importante di economia mundial, acopla na e situacion financiero y posibilidad social cu esaki lo produci, ta presenta nan mes riba plataforma internacional di cual Aruba ta parti,” informantenan ta trece dilanti.
Mundo mester ta prepara pa carga responsabilidadnan grandi riba tur tereno.
Ta den e cuadro aki, DIARIO a discuti e maneho di Gobierno Evelyn Wever-Croes durante ultimo cinco aña.
Cu insistencia expertonan riba tereno financiero y economico cu cifra y rapportnan, ta hiba Aruba di regreso na 2017, ora e bom a rementa den man di Aruba.
“Ora papia di 2017, ta papia di e momento pa cual tur instancia (di IMF te Hulanda) a adverti y no tabata solamente basa riba e hecho cu a deshaci di mitar di entrada di BBO, cu tabata reemplasa tur e reduccionnan di entradanan di Aruba na 2007 ora a introduci BBO,” expertonan ta indica.
Nan ta confirma y sigui mustra cu no ta e mitar BBO cu a scrap solamente a bay perdi pa Aruba, pero tambe e entradanan di Aruba di otro belasting cu a wordo baha, pasobra a introduci BBO.
Pero tabata tin mas situacion serio.
Na momento cu Hulanda a yega Aruba pa tuma medida, Venezuela tabata un problema pasobra ya no ta turista Venezolano tabata bini Aruba, pero refugiadonan cu tabata huy pa Nicolas Maduro y su regimen cu a nacionalisa economia y a destrui Venezuela.
Aruba no a wordo proteha na 2014 contra Maduro, pero Gobierno Mike Eman a haci Maduro su partner di un aventura yama Citgo, cu a base di desaroyonan mundial a spart for di otro, manera a wordo adverti.
Na 2017, turismo di Venezuela tabata un problema serio pero a wordo suavisa na 2017 cu e turistanan adicional cu a bini Aruba pasobra horcannan a cera porta di hopi destinacion di turismo na 2017.
Pa Aruba por a sigui cana, un reforma grandi mester a wordo introduci y mester a crea un confiansa entre Pueblo y Gobierno Evelyn Wever-Croes cu mester a tuma medida.
Ta e medidanan cu a wordo tuma na 2018 a haci cu Aruba por a sobrebibi 2020 ora Covid-19 a drenta y tambe e guera pa prijs di petroleo cu a start exactamente un aña pasa ora e Conferencia di Clima a exigi pa ataca petroleo y OPEC a contesta.
Ta den e guera di petroleo, e productor mas grandi di petroleo cu ta Rusia, a invadi Ukraine y prijs di petroleo, a destrui cuminda riba mesa di henter mundo.
“Na 2021, Pueblo di Aruba a demostra su confiansa den e gobernacion estricto di Gobierno Wever Croes, cu a pesar di tur medida cu el a tuma, a gana eleccion,” informnatenan ta indica.
Awe mundo a yega na un punto cu por wordo mira como un situacion den cual mundo a bandona su orbita di normalidad, manera ta bini dilanti.
2023 ta exigi un gobernacion di man fuerte y un base financiero cu ta haci posibel pa Aruba bandona mas debe cu ta mata futuro, pero tambe tin un reserva den uno di e pio crisisnan financiero cu mundo moderno a conoce.
E hecho cu Gobierno di Evelyn Wever-Croes a percura pa Aruba tin un saldo favorabel di 63 Miyon, ta wordo aplaudi.
“Na 2017 Aruba tabata den desesperacion financiero. Awe ta henter mundo ta na careda,” ta wordo splica na DIARIO.
Cu e surplus di 63 Miyon, Gobierno Wever-Croes ta cende un luz pa Aruba den un futuro mundial sumamente scur, den cual mester tene na consideracion e problemanan cu e sostenedor financiero di Aruba, Hulanda ta enfrenta, y e situacion economico di Merca, baluarte economico di Aruba, den un mundo cu ta papia di guera mundial.
“Aruba mester drenta futuro cu e peso di debe nacional, cu ta Aruba su problema mayor, pero tambe cu forsa propio den e mundo dirigi pa recesion y inseguridad, na entrada di 2023,” ta wordo mustra.
Awe expertonan local y internacional ta papia den DIARIO pa duna sosten na e gobernacion di Prome Ministro Evelyn Wever-Croes y presenta e realidad di futuro cu ta exigi madurez y sentido di responsabilidad di gobernacion y pueblo den un mundo, cu a bandona su orbita di normalidad.
