ORANJESTAD (AAN): E CEO di Oficina di Turismo, Ronella Croes, a laga sa di algun di e motibonan pakico ta importante pa mayoria di hende den comunidad ta vacuna.
El a bisa cu e proximo lunanan ta mustra prometedor y e hecho ta cu esaki ta mara na e vacuna.
Si mira di un banda e bishitantenan y nan comportacion y kico e interes ta den e mundo di viaheronan, por mira cu e distribucion di e vacuna den diferente pais cu ta bishita Aruba, sigur ta dunando e personanan e confortabilidad di conduci un viahe y den e caso aki un viahe pa Aruba, a remarca.
Eynan caba ta wak e impacto positivo di e vacuna bao di esnan cu por scoge pa haci un viahe. Esaki ta ilustra den diferente investigacion tambe, Croes a señala.
El a agrega cu di otro banda tin bishitantenan cu si ta puntra mas informacion referente e proceso di vacunacion bao di e populacion di Aruba.
Esaki ta algo cu ta interesa nan y no solamente nan ta mira cu nan ta safe door di vacuna nan mes, pero tambe nan kier cu e hendenan na Aruba tambe ta vacuna.
Ronella Croes a sigui bisa cu esaki no solamente ta bin dilanti di e banda di e bishitantenan pero tambe di parti di e socionan.
