ORANJESTAD (AAN) – Den e caya principal di San Nicolas, fraccion di MEP a tene su conferencia di prensa di cuminzamento di siman, unda a hiba palabra Parlamentarionan Arthur Vallejo, Alvin Molina y como invitado tabata Andres Hernandez, di San Nicolas Business Association (SNBA).
Vallejo a duna di conoce cu nan a trata un tema di sumo importancia pa e pueblo di San Nicolas, manera e supuesto fusion entre Hospital dr. Horacio Oduber y Instituto Medico San Nicolas.
E parlamentario a bisa cu el a ripara cu personanan clave den sector salud ta purba di una pusha e tema aki, un extra push, den diferente conferencia y via un medio di comunicacion.
Vallejo a bisa cu dia 25 di November ultimo, Parlamento tabata tin e dicha di tin tur minister hunto den un reunion publico, pa duna nan un presentacion di nan plan di gobernacion pa 2021-2015.
Durante e presentacion di minister di salud Dangui Oduber, Parlamento por a scucha tocante un cooperacion estrecho entre e dos centronan di salud mas importante pa Aruba, cu ta HOH y ImSan.
El a bisa cu den e momento ey di reunion su pensamento a bay directamente pa probecha y genera un mocion cu e deseo di mayoria den parlamento, pa no fusiona Hospital dr. Horacio Oduber y Instituto Medico San Nicolas.
E parlamentario a splica cu un fusion no ta bay den “un, dos, tres” y por tin consecuencia pa e cuido conoci na ImSan, actualmente.
Motibonan pa no fusiona:
Parlamentario Vallejo a señala cu ta interesante pa wak con un institucion cu ta wordo pusha y lidera pa un Arubiano, den e caso aki pa yiu di San Nicolas, cu ta haciendo un trabao fenomenal pa e maneho y direccionnan claro con e kier sigui y na unda e mester tuma accion pa sigui desaroya ImSan, na un forma sostenible, di con den e situacion di bon aki, pasobra ImSan ta hopi bon para, cu hopi bon servicio, nos kier entromete den ImSan awo?
“Mi sa cu 80% di e fusionnan cu a tuma lugar na Hulanda, por ehemplo, no a funciona en todo caso, pa reduci gasto di cuido.
Generalmente, e idea ta wordo pusha pasobra ta papia cu un fusion lo trece reduccion den gasto di cuido. Tin rapportnan Hulandes cu ta mustra cu fusion no ta nifica, specificamente, un reduccion di costo den tur sentido, y ta basicamente pa e motibo aki, kier pusha fusion na Aruba”, segun Parlamentario Arthur Vallejo.
E parlamentario a expresa cu nan mester ta hopi sincero, si pensa cu un fusion na su inicionan, no ta ta bay ta mas costoso. “Nos mester ta hopi sincero cu esaki”, e parlamentario a acentua.
“Parce cu semper mester purba pusha tendencianan bieu, cu no a funciona na Hulanda, pa bin purba nan aki na Aruba” Vallejo a subraya.
Vallejo a menciona cu mester recorda cu ni un den Parlamento a haya ningun un rapport traha serio, teniendo na cuenta e banda di medaya di ImSan, cu lo mustra nan cu enberdad lo tin reduccion di costo, si ta opta pa un fusion.
