Directora di Respado, Carolina Hart, ta splica:
ORANJESTAD (AAN): Directora di RESPALDO, Caroline Hart, hunto cu representantenan di Fundacion Anti Droga Aruba (FADA) y Stichting Hunto, a yama un conferencia di prensa relaciona cu e preparacion di e di cinco edicion di Gold Mine Run & Walk, cu lo tuma lugar dia 20 di October proximo, na Ruinanan di Bushiribana.
Señora Hart a bisa cu esaki ta e carera cu Patrishi Sports a cuminza cu ne pa aña 2020, y cu a bin ta creciendo. El a comenta cu e stakeholders envolvi cu salud mental ta hopi gradici na Patrishi Sports, pa laga nan haci uso di e fecha aki, pa trece dilanti nos comunidad, e importancia di movecion pa salud mental.
“Dia 10 di October ta e Dia Mundial di Salud Mental. Na Aruba, e stakeholders envolvi cu Salud Mental ta haci uso di e luna aki, pa trece extra informacion tocante salud mental, organiza eventonan relaciona cu e tema, cu por yuda e comunidad di Aruba compronde y ta mas envolvi, y tene un bida mental mas saludable”, señora Hart a menciona.
Caroline Hart a agrega cu den pasado Stichting Respaldo, hunto cu Fundacion FADA y Stichting Hunto, a yega di realiza un “Let’s Art for mental health” y tambe “Let’s Plant for mental health” ambos evento a resulta hopi exitoso.
“E aña aki nos a mira importancia di movecion pa salud mental, y a invita Healthy Lifestyle Center, di DVG tambe. Un biaha mas, union tey pa realiza un proyecto, pensando den e comunidad cu mester di mas informacion, tocante salud mental”, Hart a subraya.
“Movecion fisico no a importante solamente pa mantene e curpa den forma, pero tambe tin un gran beneficio pa bo salud mental. Ora bo haci esfuerzo fisico, e curpa ta produci endorfina, un substancia natural cu ta haci e persona sinti mas feliz, y ta libera stress. Movecion por yuda sinti menos ansiedad y depresion: dos problema mental mas comun den nos bida diario, awendia”, Director di Respaldo a remarca.
El a agrega cu ademas di esaki, movecion ta yuda e persona drumi mucho miho; y ora bo drumi miho e mente ta bira mas claro, e por maneha problema y retonan tur dia cu mas facilidad. E ta un manera pa subi energia y mehora e estado di animo.
“Door di tur e motibonan menciona aki, nos ta hopi contento di ta parti di e organizacion di Gold Mine Run & Walk, e aña aki”, Carolina Hart a acentua.
