Liki Perez, Coordinador di Fundacion Sonrisa:
*Tin reglanan y aspectonan cu mester adapta ainda
ORANJESTAD (AAN) – Angelique (Liki) Perez, Coordinador di Fundacion Sonrisa, den entrevista cu DIARIO a indica cu Sonrisa tin 15 aña caba cu un plataforma pa personanan cu limitacion y ta purba tur manera pa keda cla cu reglanan y aspectonan cu mester wordo adapta, y desde inicio nan a traha un plan y a bin cu ideanan pa negoshinan tene cuenta cu hende cu limitacion, pero falta mas ainda.
Perez a menciona edificionan nobo tin cu cumpli cu e rekisitonan pero toch tin cierto aspectonan cu e fundacion a bin compronde for di esnan cu ta traha cu personanan cu limitacion cu tin cosnan cu, de vez en cuando, toch ta faya. Por ehemplo, pone portanan cu ta hala un banda pero mester hala na e otro banda, por ta contratistanan eigenlijk ta haci tur nan best pa e bañonan ta adapta pero detayenan chikito ta faya, of ta un haltura of un stap, cu por haci un caso.
Angelique a bisa si, cu el a wak cu hopi lugar a adapta nan parkeo caba, pero mester sigui concientiza comunidad pasobra nan ta wak y sa cu ta pa personanan cu limitacion fisico so. Cu Sonrisa mi ta traha cu muchanan cu limitacion mental, y mi ta bisa nan tur ora cu nos ta para den parkeo normal, pasobra nan por cana.
E ta pidi famianan tambe pa stimula nan hendenan y concientiza nan cu esey ta spotnan pa personanan cu limitacion fisico, pa por pone enfasis riba esaki. Angelique a subraya cu tin hendenan cu ta nace cu limitacion pero mester papia tambe di hopi cu ta keda cu limitacion despues di un accidente, cu comunidad ta wak noticia den corant, por ehemplo, y cu despues no ta tende mas di e consecuencianan.
“Hopi hende jong a bira limita debi na accidente di bromer, auto of situacionnan asina. Nos tin cu para keto cu awo nos ta bon, pero mañan nos mes por ta den un situacion asina”, Angelique a trece dilanti.
El a agrega cu awo tin mas adelanto cu 15 aña pasa, pero ainda ta keda un reto pasobra tin leynan cu ta asina anticua cu ta stroba e proceso tambe.
“Mi ta uza un ehemplo, nos a traha cu ‘Trampolin pa trabao’ pero ainda tin cierto cosnan cu ta limita e posibilidad pasobra si nan haya un trabao, nan ta corta den nan entrada. Y loke nan a haya caba ta apenas pa nan sobrebibi y si nan ta haya un trabao nan ta kita extra, of tin cu paga bek loke nan a haya extra ey caba. Dus, pa nos, nos ta bisa ban drecha e leynan, pasobra bo kier stimula nan pa ta activo y ta un adelanto pa wak hendenan cu limitacion haya un trabao pasobra nan ta sinti sigur di nan mes y orguyoso di ta parti di nos comunidad, pero ainda falta. E leynan mester ta regla y esey no ta den nos mes sino den e legisladornan”, Angelique (Liki) Perez a señala.
