Durante aña escolar di 2025-2025...
ORANJESTAD (AAN) Pa e aña escolar 2024-2025 Stichting Sociaal Fonds Colegio Arubano a cubri pa e suma di rond 50.000 Florin na gasto pa mayor y alumnonan di Colegio Arubano. Asina un relato cu Matutino DIARIO a ricibi di señor Eric Illes ta revela.
Specialmente e contribucion mensual pa alumnonan (25850 Florin) den forma di pakete di cuminda, a pisa hopi riba e fondonan. Mirando e necesidad di mayornan, e fundacion a mantene e suma di e pakete di alimentacion y tambe extende esaki pa e luna di juli cu ta luna di vakantie.
Otro gastonan di e fundacion tabata entre otro, pago di bukinan y tambe examengeld, na un total di 14348 Florin.
For di e fondonan ricibi a duna workshop y training pa preparacion pa examen na suma total di total di 5832 Florin.
Na entrada den forma di donacion e fundacion a ricibi for di docentenan y personal di Colegio Arubano e bunita suma di 15290 Florin. Tur luna e docentenan y e personal administrativo ta haci donacion pa cubri e gastonan di e alumnonan di menos recurso. E gesto aki ta di aprecia. Di donacionnan particular y service clubs a ricibi tambe e bunita suma di 32367 Florin. E fundacion ta agradecido pa esaki.
E alumnonan y nan mayornan, a aplica pa ayudo por medio di e trahadornan social na Colegio Arubano. A base di e relato y e recomendacion e forma di e ayudo pa e alumno a keda aproba. Stichting Sociaal Fonds di Colegio Arubano ta existi como fundacion desde 2007 y ta inscribi na Camara di Comercio. Como organizacion dentro di Colegio e forma di ayudo aki ta existi ya for di añanan 80.
Cualkier instancia of particular cu kier yuda e docentenan den e causa aki, ta keda invita pa haci nan contribucion. Por haci donacion na cuenta di: RBC nr 7700000013852249 na nomber di Stichting Sociaal Fonds Colegio Arubano. Pa mas informacion por manda un email na This email address is being protected from spambots. You need JavaScript enabled to view it..
Directiva di Stichting Sociaal Fonds Colegio Arubano ta gradici tur cu di un of otro manera a yuda den e causa aki.
