Michelmira Arends, studiante di U.A di Trabao Social y Desaroyo:
ORANJESTAD (AAN) – Michelmira Arends, ta un studiante di Universidad di Aruba, ken actualmente ta cursando su di tres aña di “Social Work & Development” y e ta haciendo su pasantia den Fundacion Respeta Mi.
Michelmira a bin cu e idea di haci un investigacion cu ta trata di e rol di e fundacion den comunidad, cu ta algo cu no a wordo haci anteriormente. Ademas lo investiga e percepcion di abuso y negligencia di mucha, den e comunidad.
E encuesta lo cuminza awe diabierna 31 di Maart, y e meta ta haya sa con informa e comunidad ta encuanto e fundacion, si nan sa cuanto aña di existencia e tin, si nan a yega di ricibi algun servicio di e fundacion, si nan kier acudi na e fundacion, si nan sa con pa yega na su adres, y tambe nan kier sa e percepcion.
Kico e encuestadonan sa tocante abuso y negligencia di mucha, na Aruba. Michelmira ta kere cu e informacion aki haci falta pasobra ainda no tin mucho investigacion tocante abuso di mucha, localmente.
“Mi ta kere cu ta hopi importante, pa por traha den e tereno aki. Bo mester data, informacion, pa por desaroya plannan sosenible”, e hoben a señala.
El a agrega cu tin biaha e personanan ta bruha di fundacionnan. Fundacion Respeta Mi ta traha preventivo, y tin biaha nan por kere cu nan ta traha curativo, y esey no ta e idea.
Pesey tambe Michelmira kier haci e investigacion aki, cu e obhetivo no solamente cu nan ta contesta e encuesta, pero cu nan ta wordo informa tambe.
E hoben a comenta cu ora e caba cu e investigacion e lo entrega esaki como producto final na e Fundacion, na cabamento di su stage.
E investigacion aki ta cla caba y e lo wordo lanza awe, Diabierna 31 di Maart, riba e face page di Fundacion Respeta Mi mes, y tambe lo comparti esaki cu partners manera Centro di Hoben y Famia, y cu e boluntarionan di e fundacion pa asina nan keda comparti’e den nan facebook personal.
