Clifford Rosa, Presidente a splica:
ORANJESTAD (AAN) – Clifford Rosa, Presidente di Fundacion Rancho, a yama un conferencia di prensa, Diamars di e siman aki, den cual el a anuncia e celebracion di 12 aña di existencia di e Fundacion, cu ta tuma lugar awe dia 20 di April 2022.
El a splica cu ta un custumber caba cu cada 20 di April nan ta trece e tema nobo pa e siguiente aña, loke ta nifica e proximo periodo di trabao cu e fundacion lo ta eherciendo.
Asina Clifford Rosa a splica y a señala cu nan ta hopi contento cu e biaha aki tin diferente tema cu nan ta bay atende cune.
Un di e temanan aki ta duna danki na tur e sostenedornan, boluntarionan, medionan di prensa cu ta hiba e informacion pa comunidad, y tambe danki na comunidad cu ta duna e Fundacion palabra di apoyo pa e bon trabao cu Fundacion Rancho ta eherciendo.
Clifford Rosa a subraya cu sigur den e espacio cu nan ta ocupando aworaki, y desde algun luna caba, na Visstraat.
Rosa a expresa cu e ta orguyoso cu e fundacion ta cumpliendo 12 aña concientizando y educando e comunidad di Aruba, pero hayando tambe e educacion cu mester den e region aki.
“Pesey nos ta trece dilanti un biaha mas, e punto hopi importante cu tin di haber cu e intercambio cultural y comercial entre Aruba y La Guajira. Pakico mi ta bisa esey? Pasobra nos tin añanan bisando e importancia di tin bon comunicacion, bon relacion, bon logistica den nos region, pa asina nos por papia di seguridad di alimento. Eigenlijk, nos tin añanan pidiendo e atencion, y aworaki mi ta kere ta bolbe crea e ‘momentum’ pa nos bay traha riba esaki, mirando cu nos ta bay tin bishita di personahenan di La Guajira y algun artista cu ta bay bin, pa asina duna un presentacion awe nochi pa asina nos duna e contexto un biaha mas, di e importancia di e intercambio cultural y comercial entre Aruba y La Guajira”, Clifford Rosa a señala.
El a agrega cu e proximo aña Fundacion Rancho ta bay intensifica e concientizacion tocante e di 200 aña di Oranjestad, y esey tambe lo tin di haber cu locual por a pensa den e pandemia aki, y esaki ta wordo tuma hopi mas na serio y tambe pesey lo duna un presentacion den e contexto di awe nochi riba e importancia di e “Kooplieden Kwartier” cu ta un area hopi importante pa e area di Oranjestad.
“Y den esey nos ta bay educa e comerciantenan cu tin den e area di Oranjestad y Wilhelminastraat, pa asina nan ta mas conciente di locual ta e parti historico, y asina ey inversionnan por wordo haci un tiki miho. Nos ta desea tambe pa mira mas inversion den Oranjestad, mirando cu nos ta papiando hopi di ban proteha nos herencia, pero ban proteha eigenlijk Oranjestad, e Capital di Aruba”, Clifford Rosa a menciona.
