ORANJESTAD (AAN): Clifford Rosa, Presidente di Stichting Rancho a haci un yamada na tur doño di boto miniatura
y personanan cu tin deseo di core boto miniatura pa asisti na un reunion cu lo tuma lugar pa asina papia riba diferente tema.
Rosa a splica cu e reunion aki ta diasabra 29 di Juli na e beach caminda semper e caredanan ta tuma lugar, dilanti di Cas di Gobernador.
E reunion pa e doñonan di boto, capitan of esnan cu kier bira capitan of cu kier cumpra boto, tur informacion di boto miniatura ta bay wordo duna e dia ey. Pero esaki ta den preparacion pasobra Fundacion Rancho a wordo invita tambe pa duna un charla tocante boto miniatura na e isla di San Andres, Colombia.
El a agrega cu esey ta un informacion cu nan ta bay comparti y tambe pa haci e preparacionnan pa Aruba International Regatta caminda cu botonan miniatura un biaha mas ta bay ta dos dia activo.
Pesey ta yamando e reunion aki pa prepara tur e trabaonan cu mester wordo haci entre luna di Juli y Augustus pa e competencia di botonan miniatura por wordo organisa un biaha mas, a indica.
