ORANJESTAD (AAN): Recientemente e representantenan di Fundacion Plan di Bida, esta señora Paloma Osorio y señora Karen Torres a presenta pa un reunion cu Ministro.
Nan a duna un presentacion di e trabao di Fundacion Plan di Bida. E meta di Fundacion Plan di Bida ta pa trece conscientisacion den comunidad di Aruba, ofrece ayudo y guia riba maneho di finanzas.
Tres pilar importante pa e fundacion aki ta 1. Guia y duna sosten riba maneho di finanzas; 2. Interveni y traha un plan di areglo pa e clientenan cu ta den crisis financiero y nan ta trata di remedia e caso; 3. Controla presupuesto y/of salario di cliente cu no por controla nan propio salario.
Fundacion Plan di Bida ta siña e hendenan den comunidad con pa presupuesta y biba di acuerdo nan presupuesto. Un mal maneho di presupuesto, por trece problema financiero, problema psicologico y problema den comportacion. Tambe, Fundacion Plan di Bida ta dunando tayer na diferente compania den 6 diferente districto na Aruba.
Fundacion Plan di Bida ta desea di traha den colaboracion cu Minister di Enseñansa, dunando tayer na scol secundario na Aruba. Banda di esaki, Minister Endy Croes a haci apelacion pa duna un presentacion pa e studiantenan cu ta bay den exterior pa sigui nan estudio, pa nan tin un bon maneho di e prestamo cu nan ta ricibi pa nan estudio..
