*E lo sigui durante aña 2025
ORANJESTAD (AAN) – Rosa Leon, di Fundacion Movimento ta Bida, den entrevista cu DIARIO a menciona cu den e cuater añanan cu nan ta dunando sosten na e gruponan social, nan a ripara cu a nace tres of cuater grupo, y e meta cu FMB tin, ta pa mas adulto mayor crea gruponan hunto, anto pa ta mas activo.
“Eigenlijk, esey ta locual ta yuda bo keda no solamente saludable, pero tambe vital den bo mente. Y e contacto social ta hopi importante pa preveni soledad, y tur e vulnerabilidad. Pues, di e banda ey nos ta mira cu tin mas grupo den e transcurso di haya cu lo bay lanta”, Rosa Leon a señala.
Rosa Leon ta haya importante pa haci marketing y splica kico ta un adulto mayor. “Nos ta pensa cu adulto mayor ta sinta wak pafo, dal su koffie, lesa corant, pero e adulto mayor di awendia ta hopi mas activo y mas exigente y tin hopi mas conocemento di con nan kier bira, ora nan ta yega edad mas avanza. Y esey sigur, nos tin cu trece mas informacion tocante kico ta un adulto mayor, vital y saludable”, Rosa Leon a bisa.
E dama a comenta cu e aña aki e programa di Movimento ta Bida, a duna un lorada completo; nan ta dunando mas tayernan di trabao informativo tocante tur locual ta rondona e adulto mayor, con e mes por mehora su calidad d bida, pues ademas di pensa riba malesa, ta pensa riba con bo por fortalece bo curpa, y esakinan sigur nan lo tin’e pa 2025 tambe.
