ORANJESTAD (AAN): Fundacion Mito Croes y fraccion di AVP ta den pleno preparacion pa organiza un otro simposio cu e tema “Cooperacion strategico Aruba-Union Europeo 2.0” cu lo bay tuma lugar 18 di september 2024.
E simposio tin como meta pa habri e dialogo tocante diversificacion di Aruba su economia.
Presidente di Fundacion Mito Croes, sr. John Hart, ta splica: “Ta importante pa keda explora oportunidadnan cu por contribui na diversificacion di Aruba su economia. Den pasado bou di Gabinete Mike Eman y +II a logra hopi den e relacion entre Aruba y Hulanda pa stimula un economia di conocimento, entre otro cu atraccion di companianan y institutonan Hulandes di renombre mundial manera TNO, Rietveld Academie, Scheepvaartschool Rotterdam, Philips y Gas Unie.
Tambe den pasado nos a haci estudio pa explora posibilidad pa un UPG-status pa Aruba y e relacion strategico cu Union Europeo pa por brinda acceso na fondonan. Nos ta sigui e desaroyo den Tweede Kamer tambe di cerca, y a tuma nota cu algun fraccion den Tweede Kamer ta contemplando pa explora un UPG-status pa BES eilanden y ta habri pa mira esaki tambe pa CAS-eilanden. Cu e desaroyonan recien den Tweede Kamer, nos ta kere ta importante pa trece e topico aki back ariba e agenda politico”.
Riba invitacion di Fundacion Mito Croes y fraccion AVP, e orador principal pa e simpisio lo ta mr. Wessel Geursen, buitenpromovendus di Vrije Universiteit di Amsterdam, senior jurist na Authoriteit Consument y Markt na Den Haag. Den e dianan venidero lo bay informa mas tocante e simposio.
