ORANJESTAD (AAN): Bou di iniciativa di dos docente di scol secundario na Aruba a funda Fundacion MiJu na januari 2019
cu e meta pa yuda tur mucha y hoben bayendo scol den tur manera cu lo ta necesario pa nan lo por tin un aña escolar yena di gozo y energia sin ningun preocupacion.
Durante aña ta enfoca riba 2 actividad grandi pa recauda fondo; 1. Adopt a Child Back 2 School y 2. Christmas of Hope.
E fundacion ta traha cu liña estrecho cu e directiva y grupo di cuido di e scolnan. Via e canal aki ta ricibi tur aña un lista di nomber di e mucha/ hoben cu tin mester di ayudo social-economico-financiero.
Durante un conferencia di prensa a anuncia cu pa e campaña di Adopt a Child Back 2 School e fundacion ta cubri e schoolgeld di cada mucha/ hoben, ta duna nan 2 uniform y un tas cu tur articulo necesario pa nan por cuminsa e aña escolar nobo.
Pa e campaña di Christmas of Hope ta regala cada famia un basket yena cu comestibel y boca dushi pa asina nan por celebra un Pasco y Aña Nobo feliz y contento.
Tur esaki sin mas no por ta posibel sin e fondonan necesario. P’esey kier participa cu e fundacion ta organisando un “Back 2 School Bike Ride Weekend” den e fin di siman di 4, 5 y 6 di augustus 2023.
Awe 2 di augustus lo tin un anochi di inscripcion pa e Bike Ride weekend cu lo tuma luga na Alameda Café den John G. Emanstraat. Esaki lo ta di 6pm pa 10pm.
Dia 4 di augustus lo tin nan famoso Sunset Ride cu lo sali pa 6pm for Alameda Café y lo termina na Batata Beach Bar cu un grandioso karaoke cu premionan fabuloso. Si acaso bo persona no ta participa den e ride pero si ta desea di participa na e karaoke.
Dia 5 di augustus lo tin un Ride combina cu Sesosport cu lo start sali pa 7pm for di Pos Chikito Rumshop y lo termina na Centro di Bario y Deporte Dakota cu un Sesosport, aki lo tin un bar y cushina bon surti. Pa e sesosport lo tin premio faboloso incluyendo premio cash.
Si acaso bo no ta participa na e Bike Ride pero ta desea di forma un grupo pa participa na e Sesosport esaki ta posibel. Forma bo grupo di maximo 5 persona y inscribi pa medio di un WhatsApp na un di e numbernan di e fundacion.
Dia 6 di augustus lo termina den grandi cu un Sunrise Ride cu lo sali for di Plaza Turismo y lo culmina cu un tremendo breakfast na Centro di Bario y Deporte Dakota. E breakfast aki lo ta gratis pa tur cu a inscribi pa e Bike Ride weekend y tur otro cu kier compaña nos cu e desayuno esaki lo tin un costo.
Kier enfatisa cu tur tipo di bike ta bon bini den nan ride. Ademas kier invita tur hende cu kier bin pasa un fin di siman agradabel yena di goso y alegria hunto pa yega y forma parti di nan gran celebracion. Pa esnan cu yega y kier haci un donacion, lo tin un box disponibel. Tur contribucion ta bonbini pa asina por cumpli cu e meta.
E meta principal ta pa haya e fondonan necesario pa por yuda lo mas hopi mucha/ hoben e aña aki pa bay bek scol feliz y contento.
