E ta dedica na memoria di Grace Maduro
ORANJESTAD (AAN) – Den conferencia di prensa yama pa Fundacion “Mi Voz ta Bo voz” (MVTBV), cu a tuma lugar na Boardwalk pa noord di Costa Linda, señora Lisette Gomes a hiba palabra, y a extende un invitacion na comunidad, pa participa den un caminata Diasabra 30 di April.
Gomes a splica cu e caminata aki ta en conexion cu Luna di April, cu ta Luna di Prevencion di abuso di mucha, y nan kier cera esaki cu un caminata.
“Nos ta invita, principalmente, mayornan pa trece nan yiunan pa asina tuma parti di algo hopi educativo pasobra nos kier pa muchanan cuminza puntra tocante abuso di mucha”, Lisette Gomez a splica.
Lisette Gomes ta invita e comunidad di Aruba pa bin Diasabra awo pa 5 or di atardi y por busca e ticketnan adelanta, na e mesun lugar unda e conferencia di prensa aki a tuma lugar, pues den e parke banda di Costa Linda.
Tur mucha cu registra lo haya un headband cu e pen-wheel cu ta simbolo di abuso di mucha, y muchanan homber cu no kier uza esaki por haya un banchi. E fondonan recauda lo bay pa e programa di prevencion cu Fundacion Bo Voz ta Mi Voz ta bezig cune. E caminata ta solamente 3 kilometer; nan ta hacie cortico pa e muchanan por participa. “Nos ta pidi tur hende pa bisti na blou cu ta e color oficial di abuso di mucha. Mi kier a gradici IBiSA cu a colabora cu nos den e caminata aki. Tur persona cu tin nan ticket adelanta por pasa registra. Nos lo tey desde 4.30 or di atardi. Nos ta bay tin un dushi raspao pa tur mucha y tambe pop corn. E caminata su nomber ‘hunto pa prevencion’ mirando cu nos kier enfoca mas tanto riba e aspecto di prevencion di mucha y abuso sexual cu ta locual nos ta para pe”, Lisette Gomes a señala.
El a añadi cu e caminata aki lo ta den memoria di señora Grace Maduro, cu tabata un pilar semper pa e fundacion y tambe a hiba su lucha apart, riba abuso sexual di mucha.
Pa locual ta e ruta, e ta cuminza na Costa Linda mes, te na e rotonde di Amsterdam Manor (1.5 km bay, 1.5 km bin bek). El a reitera pa bin cu e muchanan pa cana hunto pa prevencion.
