Na ocasion di Dia Internacional di Idioma Materno
ORANJESTAD (AAN): Na ocasion di Dia Internacional di Idioma Materno, Fundacion Lanta Papiamento ta invita cordialmente tur miembro di comunidad pa participa na un charla educativo y cultural cu tin como tema: “Ortografia di Papiamento: causa y consecuencia”.
E charla ta den man di Ramon Todd Dandaré Mag. Ling., kende lo trata historia di ortografia di Papiamento cu atencion tambe pa e hecho cu tin dos ortografia di Papiamento.
E evento ta tuma lugar riba diabierna 20 di februari 2026 na Biblioteca Nacional Aruba, di 6.30 pa 9.00 or di anochi. Pa esnan cu no por asisti presencialmente, lo tin tambe livestreaming disponibel.
Fundacion Lanta Papiamento ta considera idioma materno como un pilar fundamental di nos identidad y cultura, y ta anima tur hende interesa – studiante, docente, investigador y publico en general – pa participa activamente durante e anochi aki.
Entrada ta gratis.
Hunto nos ta fortalece y promove nos dushi Papiamento.
