ORANJESTAD (AAN): Diaranson dia 8 di december un comision apunta pa directiva di Fundacion Lanta Papiamento (FLP) a bishita Minister di Enseñansa y Deporte señor Endy Croes y a trata algun topico hopi importante pa desaroyo di un nacion Arubano sano.
FLP a informa tocante e urgencia y importancia pa lanta un instituto linguistico na Aruba. A splica tambe cu e instituto aki lo percura pa un maneho integral di idioma na Aruba, basa riba planificacion di prestigio y imagen, di corpus, di adkisicion y di status di Papiamento. Naturalmente door di enfoca riba e situacion real y actual di e situacion linguistico na Aruba.
Tambe FLP a splica hopi detaya e urgencia di cumpli cu tratadonan internacional di derecho di mucha y di respeta articulo 1 di constitucion di Aruba, pa ningun mucha of hoben worde discrimina mas den nos sistema di enseñansa pa motibo di su idioma materno. A referi na e rapport di UNICEF (2013) cu ta splica cu e modelo di enseñansa Hulandes no ta adapta na e necesidad di Aruba y cu esaki ta e causa di e problemanan grandi cu nos tin.
Esaki tin su consecuencianan social, cultural y economico. A splica e urgencia cu World Bank a señala pa loke ta trata Post Covid-19, pa evita un aumento di mucha te un edad di 10 aña cu no por lesa (comprensivo) den paisnan cu ingreso abou of medio. Situacion na Aruba ta cu un gran mayoria di mucha den e sistema di enseñansa na Aruba, unda e idioma di instruccion ta uno stranhero, pues Hulandes, por saca zonido di e letternan cu e ta mira, pero sin compronde loke el a lesa.
Tambe a splica den liñanan grandi con e ser humano ta siña, kico ta pasa den e celebro y relaciona esaki cu e importancia di siña den su idioma materno. A pone hopi enfasis den inversion cu lo mester haci den enseñansa na beneficio di calidad di enseñansa, mara na e metanan di desaroyo sostenibel 4 (SDG4), Plan Educacion Nacional 2030 y Scol Arubano Multilingual. FLP ta consciente di COHO y cu lo bay tin un rapport tocante e sistema di enseñansa na Aruba. FLP ta mira esaki como oportunidad pa nos profesionalnan porfin haya recurso pa inverti den loke mester y den loke ta efectivo den enseñansa di Aruba, basa riba teoria y investigacion cientifico y no segun suposicion sali di mente colonial y colonisa.
Na final a entrega e Plan Strategico di Fundacion Lanta Papiamento 2020-2025. Den e plan tin describi e vision y mision di FLP y e direccion strategico cu FLP lo hiba te 2025 pa por logra e metanan proyecta.
Tabata un reunion hopi ameno, informativo y educativo y sigur no lo ta e ultimo reunion entre FLP como un organizacion no gubernamental (NGO) y Minister di Enseñansa y Deporte.
Riba e potret por mira di robez pa drechi, Joyce Pereira (co-fundado di FLP), Eduard Pieters (presidente di FLP), Minister Endy Croes, Evelyn Ruiz-Croes (secretario di FLP), Mientje Croes (miembro di directiva di FLP).
