ORANJESTAD (AAN): E epoca di digitalizacion nifica cu awor ta tur hende tin di percura pa bo tin acceso na un computer pa por logra haci cierto tramitenan online.
Winston Tavarez di e organizacion di Dominicanonan, a bisa cu nan tabatin un curso pa duna les di computer na hendenan di edad grandi. Corda cu ora cu e pandemia di Covid-19 a haci acto di presencia, di e tempo ey na un forma acelera ta tur cos a worde digitaliza.
Tavarez a splica cu Fundacion Dominicana Arubaanse Juan Pablo Duarte no ta keda atras den esey. Awor nan a haya chens di duna un bunita curso di computer. Di e forma aki, e Fundacion ta encurasha tur hende pa tuma parti na e curso, y bo tin di djis duna un contribucion chikito.
Segun Tavarez a nota, cu di esnan cu ya caba a registra, tin hopi hende cu no sa nada di Computer ni di Internet. Tambe a haya hende di riba 60 aña di edad cu a inscribi, mustrando cu nan interes ta hopi halto.
Fundacion Dominicana Arubaanse Juan Pablo Duarte ta insisti cu e curso basico aki ta habri pa tur edad. Nan meta ta pa ofrece e curso aki na un forma continuo pa di e forma ey yuda comunidad. Pasobra awendia si bo sa mas di tecnologia, e ta sali bo di bon.
E curso lo siñabo con pa cende computer, con pa subi email, con pa aplica y habri email, y tambe lo dunabo les con pa habri Microsoft Word, con pa traha cu Microsoft Exel, etc.
Winston Tavarez a mustra cu e contribucion ta hopi pagable, y lo dunabo 1 luna di curso. Bo por escoge grupo di Diamars y Diahuebs anochi 7:00 pm pa 9:00 pm. Of bo por escoge grupo di Diasabra mainta so di 9:00 am pa 12:00 pm.
Manera ta conoci, Fundacion Dominicana Arubaanse Juan Pablo Duarte a duna hopi yudanza na hendenan di menos recurso cu pakete di cuminda durante e Pandemia. Nan a traha cu Cruz Cora, tambe Fundacion Pa Nos Comunidad, y algun Fundacion mas cu a coopera.
Nan kier sigui cu e dunamento di servicio na comunidad. Toch Tavarez ta admiti cu contribucion di miembronan a cay un poco, debi cu Pandemia a afecta entrada di hopi hende. Toch ta buscando un forma pa e Fundacion por sobrevivi y por sigui traha pa comunidad.
Aunke awor cu Aruba ta recuperando, ta mustrando cu comunidad Dominicano biba na Aruba tambe ta pasando den e proceso ey. Ta conoci cu tin hopi cu a djis dicidi na bandona Aruba y busca nan futuro na un otro pais.
Pa por yuda e Dominicanonan integra mas, e Fundacion Dominicana Arubaanse Juan Pablo Duarte tin pensa di introduci curso di Ingles y Hulandes tambe pa asina yuda impulsa e conocemento y progreso di nan trabao.
Semper Fundacion Dominicana Arubaanse Juan Pablo Duarte ta habri pa ricibi donacion, y por haci esaki via nan telefon 582-5890 pa asina duna nan chens di sigui coopera cu comunidad Dominicano of pueblo di Aruba en general.
