ORANJESTAD (AAN): Stichting Dijkhoff Papiamento Cursussen a worde funda na Hulanda dia 6 di maart 2012 door di Gregor Dijkhoff,
yiu di linguista/autor difunto Mario A. Dijkhoff cu ta conoci pa su diccionario Nederlands-Papiaments / Papiaments-Nederlands.
Ultimo añanan e stichting a re-imprimi varios buki di Mario Dijkhoff manera Papiamento Un pa Un (Papiaments stap voor stap), Proverbio y Dicho di Aruba, Gramatica di Papiamento y Terminologia Gramatical. Recien Gregor y su ruman Maik a publica e bukinan nobo nobo Papiamento Step by Step y tambe Papiamento Paso a Paso.
Desde 2012 Gregor ta ofrece curso di Papiamento y poco poco Gregor a profesionalisa su cursonan.
Na Aruba Gregor a duna un curso pa maestronan di Basisschool de Schakel y Schakel College y el a organiza workshop di Papiamento na Biblioteca National. Na Hulanda el a duna les pa entre otro Tweede Kamer der Staten-Generaal, Politie Zwolle y Groningen, DUO (Dienst Uitvoering Onderwijs), Hogeschool van Arnhem en Nijmegen, Hanzehogeschool Groningen, Berlitz Schools of Languages, varios otro compania y hopi persona cu ta emigra pa Aruba, Curaçao of Bonaire. Si bo conoce hende interesa pa siña nos dushi Papiamento, anto duna nan e informacion aki. Gregor tambe ta duna les online via videoconference.
Meta principal di e Fundacion ta: Organiza curso di Papiamento pa tur hende cu no ta papia Papiamento y duna informacion cultural. E stichting semper ta interesa pa colabora riba proyecto cu kier hiba nos Papiamento padilanti.
A ser splica na DIARIO cu tin algun buki nobo cu lo worde publica e aña cu ta bin.
