ORANJESTAD ((AAN): Charlene Leslie di Fundacion Diabetes Aruba a duna di conoce cu nan ta organisando diferente actividad den cuadro di Dia Mundial di Diabetes.
El a indica e dia aki ta wordo conmemora tur aña riba 14 di November. E tema di e aña aki ta enfoca riba e acceso na cuido. Esaki ta e tema cu e federacion internacional di diabetes a pone na aña 2021 te cu 2023, e aña aki 2022 enfocando specialmente riba e parti di educacion y actividadnan pa proteha pa mañan, a bisa.
Fundacion Diabetes Aruba tin diferente actividad y un di nan ta esun conoci caba cu ta PRISMA, cual ta un programa cu nan tin pa 3 aña caba unda ta enfoca riba e maneho propio di diabetes tipo 2. Esey ta un curso specialmente pa personanan cu tin diabetes tipo 2 pa nan siña maneha e diabetes mas miho, Leslie a señala.
El a agrega cu durante e curso aki e participantenan ta ricibi mas conocimento, y ta haya mas habilidadnan como tambe hermentnan pa asina nan por haci cambionan den nan estilo di bida, den nan scogencianan di cada dia pa por maneha diabetes.
Banda di PRISMA, tin algun otro curso activo cu cada persona cu diabetes tipo 2 por participa den e curso aki completamente gratis y te hasta nan por trece un miembro di famia, pareha.
Pa esaki tin diferente fecha. Esnan cu ta interesa den participa e cursonan aki por bishita nan website www.fdaruba.com of bishita nan medionan social, Charlene Leslie a expresa.
Tambe tin otro actividadnan hunto cu Fundacion CVA, Heart Foundation y Club Kibrahacha. Esaki yama 'Preveni cu cuminda'. Esaki ta bira e di tres biaha cu nan a hacie e aña aki caba. Ta un tayer pa duna informacion relaciona cu e factornan di riesgo di diferente problema di salud y no solamente diabetes, pero tambe malesanan cardiovascular y CVA (atake cerebro-vascular).
Segun Leslie, e participantenan ta haya informacion na un manera hopi interactivo y lo finalisa c'un parti practico unda nan lo prepara algun receta cu ta cay bao di e mesun tema aki.
E ultimo actividad pa e aña aki ta diasabra awor 29 di October na Club Kibrahacha. Tin algun cupo habri ainda y pa inscripcion mester tuma contacto cu Club Kibrahacha directamente.
Relaciona cu Dia Mundial di Diabetes mes lo tin un 'media tour' manera tur aña. Tin algun charla organisa tambe y lo ta presenta na e diferente exponan di salud cu ta planea caba pa e resto di e aña aki. Pero mas specificamente ta bay tin e di cinco edicion di e 'Diabetes Run & Walk' conhuntamente cu Botica di Servicio y algun otro partner.
