ORANJESTAD (AAN): Dia 15 di juni Fundacion Centro Famia di Piedra Plat su directiva tabatin un reunion hopi special.
E presidente Adri Berg a haci un presentacion di e historia con e fundacion a cuminsa na aña 2010, su retonan, su desaroyo y unda nan ta awor aki y con pa sigui padilanti.
Durante e reunion aki a cuminsa traha riba un plan di trabou pa e añanan binidero, con pa sigui traha riba nan localidad pa e por bira mas moderno y eficiente, siguridad segun e normanan y pa cumpli cu e demandanan segun e desaroyo den e epoca actual.
E encuentro ta e prome paso pa hunto cu profesionalnan riba diferente tereno delibera hunto kico ta e posibilidadnan cu nos tin pa sigui desaroya proyectonan na bienestar di nos comunidad pa un miho futuro dunando servicio comunitario y sigui traha hunto cu CEDE Aruba/Barionan Unico y otro stakeholder nan.
Willy cu ta forma parti di e hunta directiva a percura pa un desayuno excelente y merece un aplauso grandi. Como cu dia di tata tawata den porta, e cabayeronan a ricibi un "danki special" pa nan trabou boluntario.
