Carolina Span, di Fundacion Autismo, den entrevista cu Hubentud den Movecion
a señala cu ta derecho di tur studiante pa tin un educacion di nivel halto, y cu tur hende ta carga e responsabilidad aki, pues no solamente scol, educador of e mayor, “pero henter comunidad con ta bay para p’esey tambe?”
Carolina Span a indica cu pa tur adolescente tin cambio; pa alumnonan di scol basico cu despues di tin un educador, diripiente ta haya cu yen di educador den un dia, loke ta un cambio grandi y un reto grandi pa tur hoben.
“Pero ora nos ta papia di grupo di autista, e ta un challenge pa e maestro tambe pasobra e no tin e studiante tur dia. Anto e tiki ‘win’ cu nan tin den un of dos ora di les, e studiante ta bay na otro meneer of juffrouw cu tin otro manera di duna les, y no ta bay on cu e situacion, y e ganashi cu e tin ta perde hopi lihe tambe”, Carolina Span a splica.
Locual Fundacion Autismo ta haciendo, ta purba encurasha scolnan pasobra na e momento aki e no ta un maneho y nan ta purba encurasha nan pa nan tin un maneho den nan mesun scol, cu ta inclusivo y tur e educadornan ta riba mesun linea.
Como scol e ta dicidi ki stap ta tuma ora un situacion presenta, con ta bay adecua cu su consistencia pa un persona neurodiverso. Fundacion Autismo ta trahando riba e parti aki. Nan ta papia cu scolnan y a haci varios workshops den 2024 y lo sigui traha riba dje, no solamente pa e maestronan ora un situacion presenta pero tambe yuda e bestuurnan p’asegura e consistencia aki.
Pa loke ta mayornan e fundacion tin e “Parents support group”, y esaki ta e temanan cu nos ta purba encurasha mayornan tambe, y ta tene cuenta cu locual nan sinti cu nan mester.
“Nos por inventa y bisa ‘esaki ta un lista di cosnan cu nos kier duna mayornan, pero ta masha importante pa scucha tambe kico nan necesidadnan ta. Mi ta hopi contento di bisa cu nos tin un sistema den nos ‘parents support group’ cu ta laga nan skirbi un necesidad specifico, cu un pregunta specifico y ultimo lunanan nos a traha hopi riba esey, riba contesta e necesidad ey, pa nan bisa nos kico nan ta pensa riba cierto situacionnan”, Carolina Span a splica.
