No ta bay ta necesario mas pa ta parti di grupo di trahador
ORANJESTAD (AAN): Durante un conferencia di prensa Diabierna mainta, presidente di sindicato FTA Hose Figaroa a trece dilanti cu nan ta lanza miembresia individual di FTA, cu ta nifica cu un empleado no tin mester forma parti di un grupo di empleado, pa bira miembro di FTA, pa wordo representa pa e sindicato.
Segun Figaroa, esaki for di decadanan di 80 y 90 caba tabata un pensamento cu awor ta bay bira realidad.
“Hopi biaha no ta facil pa forma un grupo suficientemente grandi pa bo gana un referendum pa cuminza negocia un CAO, pero constitucion di Aruba ta bisa cu cada trahador tin un derecho pa afilia su mes na un sindicato.
Esaki segun e presidente di FTA, kende a sigui bisa cu e ora ey a cuminza pensa riba un manera pa trahadornan individual bira miembro di FTA.
El a splica cu pa por representa trahadornan individual di e forma aki, ta pone cu FTA mester organiza su mes di tal forma cu esaki ta bira posibel.
A tuma 2 pa 3 aña di preparacion y awor cu organizacion di FTA a crece bastante, cu personal extra, e sindicato por manera esaki.
“Pa algun aña caba e demanda tey pa e servicio aki, mirando cu constantemente nos tabata wordo puntra”.
Pa haci'e na un manera responsabel, aña pasa bon FTA a contrata un compania externo pa haci un investigacion pa nos, no solamente riba kico ta e deseonan pa miembresia individual, pero tambe kico asina ta e servicionan cu lo por spera di FTA.
A base di e resultadonan di e investigacion basta extenso cu a wordo haci, nos a hinca un pakete den otro, segun Figaroa.
El a indica cu miembresia individual ta algo nobo, pero ta parti di evolucion di FTA.
