ORANJESTAD (AAN): Free Zone Aruba N.V. (FZA) tin e plaser di anuncia e lansamento oficial di su website nobo, www.freezonearuba.com loke ta marca un milestone importante den e esfuersonan di transformacion digital di e organisacion.
Despues di hopi aña sin un actualisacion completo, e ekipo interno di FZA, den colaboracion estrecho cu e ekipo di proyecto di CaribMedia, a desaroya y ehecuta un plan strategico pa renoba e website completamente. E resultado ta un plataforma moderno y amigabel pa e usuario cu ta cumpli cu e estandarnan digital di awe y ta brinda acceso facil na informacion exacto, actualisa y relevante tocante e Zona Liber di Aruba.
E website nobo tin un structura intuitivo y un navegacion balansa, haciendo e practico y accesibel pa un variedad amplio di usuario, incluyendo inversionista, socio, partidonan interesa (stakeholders) y publico en general cu ta busca informacion tocante Free Zone Aruba y su servicionan.
Mescos cu riba e website anterior, e plataforma nobo tambe tin un area di login sigura pa e companianan den Zona Liber. E portal dedica aki ta permiti companianan comunica directamente cu FZA y entrega reportenan rekeri digitalmente, contribuyendo na operacionnan mas eficiente, structural y transparente.
Free Zone Aruba N.V. ta extende su aprecio na CaribMedia pa e colaboracion fuerte, experticio creativo y e habilidadnan tecnico cu a hunga un papel crucial den entrega di un solucion digital di alta calidad cu ta cuadra cu e obhetivonan operacional y strategico di FZA.
Cu e lansamento di e website nobo aki, Free Zone Aruba N.V. ta reitera su compromiso cu innovacion, excelencia den servicio y mihoracion continuo pa apoya e comunidad di negocio den Zona Liber.
