Uso y abuso riba social media ta sin control - ORANJESTAD (AAN): Hopi hende ta keha riba e ofertanan cu ta wordo publica riba Facebook. Esaki no ta algo di awor, pero si di basta tempo caba.
Un biaha mas DIARIO a haya reaccion di personanan cu ta reclama pasobra nan ta constatando cu riba e paginanan di oferta y demanda (vraag en aanbod) cu tin riba Facebook na Aruba tur cos ta posibel pa wordo publica y ofreci.
E parti mas tristo ta cu parce cu no tin control. Esnan cu ta administra e paginanan aki parce cu no ta worry. Apesar cu tin hende cu ta kibra e reglanan relaciona cu locual ta wordo publica por mira cu tin algun administrador cu no ta haci nada.
Pa menciona algun ehempel. Oferta pa servicionan sexual, di prostitucion ta na ordo di dia. Posibelmente ta trata di cuentanan falso (fake accounts), pero tambe tin e posibilidad cu ta trata di personanan cu no ta na Aruba of cu ta na Aruba y cu no ta residente y cu ta buscando algo di haci.
Esaki ta un di e casonan cu algun lector a menciona cu a wordo mira den weekend relaciona cu un muher ofreciendo videonan sexual, potret y demas servicionan. Cu ta 'fake' of no esey no ta conoci.
Otronan, ta uza 'fake accounts' pa daña nomber di hende cu acusacionnan falso of door di expone publicamente un situacion totalmente priva pa daña e reputacion di un persona.
Kico por haci pa evita di keda wak e tipo di publicacionnan aki? Ta recomendabel pa denuncia e publicacion na e administradornan di e pagina of directamente na Facebook.
Tin e posibilidad riba e publicacion mes (ariba na man rechts) pa reporta e publicacion na e administradornan y tambe eynan mes te hasta por report'e directamente cu Facebook.
Manera DIARIO a trece dilanti caba, tin un sociedad hopi exponi na e mal uso di social media. Awendia tur cos ta posibel y si no tin un stop lo sigui cu e tipo di cosnan sinberguenza aki.
