ORANJESTAD (AAN): Eduard Pieters, miembro activo y di fraccion di Partido Patriotico Arubano (PPA),
a haci un bishita recientemente na San Nicolas, riba peticion di diferente habitante cu kier mustra nan disgusto y preocupacion riba situacion deplorabel y peligroso di hopi facilidad den nan districto. Remarcabel tabata cu un di e puntonan mas urgente ta e Teresita Plein, caminda e asfalt ta den un condicion hopi malo y ta forma un peliger directo pa mucha, e habitante- y bishitantenan.
Peliger pa mucha y adulto grandi
“E plenchi ta wordo uza tur dia pa e muchanan di Scol Basico Teresita, cu mi ta considera como un di e mihor scolnan na San Nicolas,” Pieters a bisa. “Pero ta dificil pa nan por brinda un ambiente sigur pa hunga y distrae. No solamente scol ta uza e plenchi, pero tambe e parokianonan, e habitante- y bishitantenan di Misa Santa Teresita y di Teresita Center. E buraconan den e asfalt ta un peliger, specialmente pa nos adultonan grandi cu por cay y haya consecuencia serio.”
Fondo desapareci
Segun Eduard Pieters, fraccion PPA ta corda bon cla, cu durante e debate di presupuesto 2025 di pais Aruba a confirma cu tabatin e fondonan disponibel pa traha den e area aki. “Unda e placa aki a keda?” ta pregunta di Pieters. “Dicon e plenchi ainda ta yen di buraco, mientras cu vakantie di scol tabata un oportunidad ideal pa renoba e area sin stroba les? Tabata un momento ideal p’e muchanan haya un plenchi nobo y safe, ora nan bolbe scol.”
Mocion y amienda rechasa
Fraccion PPA ta enfatisa cu nan a presenta tanto mocion como amienda durante e debate di presupuesto 2025. E amienda tabata pa baha gasto di gobierno y aloca fondo pa drecha entre otro Teresita Plein y sigui cu e proyecto di embeyecemento den centro di Promenade bay ariba. Fraccion di PPA a urgi gobierno pa dedica mas atencion na San Nicolas via un mocion tambe. Pero tanto e parlamentarionan di fraccion di AVP y FUTURO a vota contra, incluyendo e parlamentarionan cu ta representa San Nicolas.
Sero Colorado ta den decadencia total
Sinembargo PPA no a rindi, y durante di tratamento di presupuesto di TPEF, PPA a bolbe trece un amienda pa por haya mas fondo y realoca e fondonan pa entre otro embeyecemento di San Nicolas. Tambe a presenta un mocion, pa renoba e area di San Nicolas aki, duna atencion na e Museonan na San Nicolas, Mehora y pone mas iluminacion pa seguridad cu ta hopi crucial riba e caminda pa Sero Colorado. “Nos ta mira un abandono cronico, caminda na werki y sushedad riba caminda pa un atraccion turistico asina importante. Esaki no ta aceptabel,” Pieters a agrega.
San Nicolas merece mihor
Fraccion PPA ta haci un apelacion urgente na Gobierno: “San Nicolas y henter Aruba merece mihor. Nos di fraccion di PPA lo sigui insisti y urgi gobierno actual, cu mester inverti den seguridad, bida y imagen turistico y habitual di San Nicolas. Ta ora pa tuma accion real y duna e comunidadnan e respet cu nan merece,” Eduard Pieters a finalisa bisando.
