ORANJESTAD (AAN): Minister di Husticia y Asuntonan Social, Sr. Rocco Tjon, a anuncia dialuna e lansamento di un campaña nobo pa conscientisacion pa siguridad den trafico.
Fraccion di MEP den Parlamento di Aruba ta elogia Minister Tjon pa e tremendo iniciativa aki, enfocando riba mehoracion di e siguridad den trafico y reduci accidentenan.
E campaña, cu ta cuminsa entrante 1 di Maart, ta enfoca riba varios aspecto cu ta contribui na accidentenan di trafico manera core bou influencia di alcohol, core cu velocidad halto, distraccion den auto, no haci uzo di 'seat belt' y 'child seat'.
Ademas, e campaña lo educa riba interseccionnan den trafico pa evita confusion cu por causa accident.
Un aspecto resaltante di e campaña ta e lansamento di e website www.traficosigur.aw, cu ta brinda comunidad cu informacion vital pa mehora siguridad den trafico. E website ta inclui contenido educacional tocante peligernan di trafico, tips pa preveni accidente, reglanan y leynan di trafico, y informacion tocante e camindanan nobo manera Watty Vos Boulevard y Green Corridor.
Segun e minister, e campaña ta un esfuerzo pa reduci e cantidad di accidente di trafico cu a aumenta den ultimo añanan.
Na final di aña 2022, Aruba a registra 7,341 incidente riba caminda, cual a afecta 13,069 persona, unda cu 75% di e accidentenan aki a wordo causa pa falta di atencion of distraccion.
Fraccion di MEP tambe ta elogia e echo cu ademas di e campaña pa conscientisacion den trafico, e mandatario a inverti den mehora e capacidad di Cuerpo di polis y departamentonan di emergencia manera Brandweer.
Fraccion di MEP ta reconoce e esfuersonan di Minister Rocco Tjon pa mehora siguridad y bienestar di e comunidad.
Pa completa e esfuerzo di e campaña, ta invita tur ciudadano pa participa activamente via e website www.traficosigur.aw, cu pronto lo keda activa, compartiendo preocupacionnan, opinion y sugerencianan pa mehora e siguridad den trafico.
