Presidente di Parlamento Marlon Sneek:
* Niun hende no tin nada di bisa Parlamento solamente pueblo
ORANJESTAD (AAN): “Parlamento ta un organo autonomo. Niun hende no tin nada di bisa Parlamento cu no ta e pueblo cu ta vota pa e parlamentarionan”, asina Presidente di Parlamento Marlon Sneek a expresa den un entrevista pa referi na e hecho cu Fraccion di MEP cada biaha ta manda carta pa Gobernador di Aruba, SE Alfonso Boekhoudt. Segun e, Fraccion di MEP ta molestia Gobernador cada biaha mientras cu areglo di estado di pais Aruba ta papia palabra cla, esta cu Parlamento ta un organo independiente y niun hende no tin nada di bisa Parlamento.
El a expresa cu loke ta mas tristo ta e gañamento cu tin den e cartanan cu e fraccion den oposicion ta manda pa Gobernador. Un ehempel di gañamento den nan carta ta cu Fraccion di MEP ta menciona cu Presidente di Parlamento riba su mes a cambia un OV pa un OB.
Señor Sneek a enfatisa cu esaki no ta berdad. Loke si ta berdad ta cu na prome instante a drenta e peticion pa un OV. Presidente di Parlamento a combersa esaki cu Parlamentario Edgard Vrolijk, cu ta esun cu ta carga e reunion riba e tema di e un dump ilegal den cercania di su cas. Segun Sneek, Parlamentario Vrolijk a expresa cu no tin niun problema y cu e ta hay’e un bon idea pa cambia e OV pa un OB na unda e minister ta splica prome y despues parlamentarionan ta haci pregunta. Den un OV, esaki ta net lo contrario.
“Nos ta lamenta e tipo di muchachadanan aki di manda carta pa Gobernador y molesti’e caminda cu e Lider di Fraccion di MEP ta un hurista cu sa bon bon con un areglo di estado di e pais aki ta cu Parlamento ta un organo idependiente”, Presidente di Parlamento Sneek a expresa.
