Parlamentario Shailiny Tromp-Lee:
Awe ta un dia riba cual nos ta para keto un rato na e balor di prensa. Tur aña riba dia 1 di September ta duna atencion special na e trabou di prensa y sigur ta un bon momento pa refleha riba e profesion importante aki pa Aruba
Den tur pais den cual ta existi un estado di derecho cu garantianan pa expresion liber, e periodista lo mester por eherce su trabou pa informa e pueblo deidamente. Libertad di exprecion ta e fuente di tur libertad y sin dje no tin democracia valido.
Libertad di expresion ta un derecho fundamental y ta trece e responsabilidad pa entrega informacion corecto y berdadero pa nos comunidad, kedando mas cu claro den e margen di respet y profesionalismo y nos Fraccion ta kere den esaki. Manera nos Prome Minister a yega di bisa:“Ta hopi importante pa un pais, pa prensa uza su libertad di expresion na un manera responsabel y cana den e margen di locual ta libertad y no libertinage.
Ora cu prensa ta wordo mal uza cu intencionnan pa reparti informacionnan incorecto, manera e fenomeno di ‘Fake News’ of te hasta pa daña nomber di nos dushi Aruba of bon nomber di un persona, nos ta e ora na un punto hopi peligroso”.
Prensa tin e tarea pa informa pueblo di e susedidonan cu ta tuma lugar den comunidad y den mundo. Banda di informa nan ta educa tambe. Awen tempo informacion ta accesibel facilmente, djis habri bo telefoon, ipad of computer, mientras antes nos tabata depende mas di radio of television. Esaki banda di e realidad cu e fuente di informacion a bira mucho mas habri. Manera menciona, door di technologia, noticia y informacion di sucesonan local y rond mundo ta yega nos masha lihe mes.
Esaki di un otro banda ta hasi e trabao di e periodista mas dificil ainda, esta pa por defini ki suceso ta contene balor periodistico y cual no. E ultimo aki sigur ta un tema pa discucion den e contexto di e tarea di prensa pa informa, educa y contribui na benificio di un desaroyo positivo di nos comunidad. Un discussion cu ta na su lugar pa hiba en conexion cu e dia aki.
Riba e dia especial aki den nomber di Fraccion di MEP mi ta felicita prensa completo, local y internacional. Masha danki pa boso trabou diario di informa y educa nos pueblo. Sigui realisa e importancia di boso trabou y hacie na un manera responsabel y na beneficio di nos sociedad. Masha pabien.
